Kim Chen In yadro qurolidan foydalanish bilan tahdid qildi

^{Foto: Reuters}
Shimoliy Koreya yetakchisi Kim Chen In Koreya xalq armiyasi maxsus bo‘linmalari o‘quv bazasiga tashrif buyurdi va u yerda o‘tayotgan mashg‘ulotlarni kuzatdi.

Uning ta’kidlashicha, agar mamlakat hujumga uchrasa, hech ikkilanmasdan barcha mavjud kuchlardan, jumladan, yadroviy quroldan foydalanadi.

KXDR yetakchisi Janubiy Koreya prezidenti Yun Sok Yeolni “qo‘g‘irchoq” deb atab, Janubiy Koreya rasmiylari va AQSH o‘rtasidagi yadroviy ittifoqni tanqid qilgan.

“Agar o‘ta ahmoqlik va beparvolikka botgan dushmanlar bizning takroriy ogohlantirishlarimizga e’tibor bermasalar va Janubiy Koreya hamda AQSH ittifoqiga ishonib, KXDR suverenitetiga kuch ishlatishga harakat qilsalar, biz rahm qilmaymiz”, deya qo‘shimcha qilgan Kim Chen In.

^{Foto: Reuters}
Siyosatchi Shimoliy Koreya olimlarini “yadroviy tahdidlarga javob bera olish” uchun yadroviy materiallar ishlab chiqarishni ko‘paytirishga chaqirgan.

1 oktyabr kuni Janubiy Koreyada qurolli kuchlar tashkil topganining 76 yilligi nishonlangan edi. Mazkur bayram munosabati bilan Seulda keng ko‘lamli harbiy parad bo‘lib o‘tdi. Mamlakat prezidenti Yun Sok Yeol agar Pxenyan Janubiy Koreyaga qarshi yadroviy qurol ishlatmoqchi bo‘lsa, Janubiy Koreya va AQSHning javobi “hal qiluvchi va hayratlanarli” bo‘lishini va’da qilgan. “Zamin” yangiliklarini “Twitter”da kuzatib boring