Olimlar qon guruhi va erta insult xavfi oʻrtasidagi bogʻliqlikni aniqladi

^{Foto: Getty images}
Merilend universiteti olimlari ikkinchi qon guruhiga (A) ega odamlarda 60 yoshga qadar insultni boshdan kechirish xavfi yuqori ekanini aniqladi. Bu haqda ScienceAlert xabar bermoqda.

Ushbu sohadagi tadqiqotlar 2022 yilda boshlangan. Oʻshanda olimlar A1 kichik guruhi va yoshroq odamlarda insult xavfining yuqori boʻlishi oʻrtasidagi bogʻliqlikni aniqlagandi.

Olimlar 17 ming insultga chalingan bemor va taxminan 600 ming sogʻlom insonlarni qamrab olgan 48 ta genetik tadqiqot natijalarini tahlil qildi. Tadqiqot ishtirokchilarining yoshi 18 yoshdan 59 yoshgacha boʻlgan.

Soʻnggi tadqiqotlar shuni koʻrsatdiki, ikkinchi qon guruhidagi odamlarda insult ehtimoli boshqa qon guruhlari egalariga qaraganda 16 foizga yuqori. Aksincha, birinchi qon guruhiga ega boʻlgan odamlarda xavf 12 foizga past boʻlgan.

Shu bilan birga, katta yoshdagi ikkinchi qon guruhli odamlarda insult xavfi sezilarli emasligi aniqlandi. Bu esa yoshlarda kasallikning rivojlanish mexanizmlari boshqacharoq boʻlishi mumkinligini anglatadi.

Tadqiqot rahbari Stiven Kittnerning ta'kidlashicha, xavfning aniq sabablari hali noma'lum. Uning taxminicha, bu qon ivishining oʻziga xos xususiyatlari, trombotsitlar yoki tromblar hosil boʻlishida ishtirok etuvchi oqsillar bilan bogʻliq boʻlishi mumkin. Aniq ma'lumotlarni olish uchun qoʻshimcha tadqiqotlar talab etiladi.

Avvalroq amerikalik olimlar dush va tish choʻtkasida yuzlab noma'lum viruslarni aniqlagandi. Biroq bu haqda tashvishlanishga hojat yoʻq. Tadqiqotchilarga koʻra, bunday bakteriofaglardan antibiotiklarga chidamli boʻlgan bakterial infektsiyalarga qarshi kurashishda foydalanish mumkin. “Zamin” yangiliklarini “Telegram”da kuzatib boring