Tojikiston Respublikasi Rossiya Federatsiyasiga talabnoma yoʻlladi

Tojikiston Respublikasining Inson huquqlari boʻyicha vakili (ombudsman) Umid Bobozoda rossiyalik hamkasbi Tatyana Moskalkovaga talabnoma yubordi. Unda Rossiyada mehnat qilayotgan migrantlarning huquqlari poymol etilayotgani yuzasidan xavotir izhor qilingan.

«OAV va ijtimoiy tarmoqlar xabarlaridan ma'lum boʻlishicha, ayni paytda Rossiya Federatsiyasi hududida mehnat muhojirlarining hujjatlari qonuniyligi tekshirilmoqda. Ijtimoiy tarmoqlarda e'lon qilingan videomateriallarda huquqni muhofaza qiluvchi organlar xodimlari migrantlarga nisbatan qoʻpollik, kaltaklash, haqoratlash kabi taqiqlangan usullarni qoʻllayotganini koʻrish mumkin. Biz muhojirlarning huquq va erkinliklari buzilayotganidan xavotirdamiz», – deyiladi talabnomada.

Tojikiston ombudsmani mamlakat fuqarolari, xususan, davlat xizmatchilari, talabalar, keksalar, ayollar va bolalar Rossiya chegarasida uzoq vaqt hibsda qolayotgani, ularga kerakli shart-sharoit yaratilayotganini ham tanqid qilgan.

Umid Bobozoda Tatyana Moskalkovaga Tojikiston fuqarolarining haq-huquqlariga rioya etish muhimligini eslatib, bu kabi holatlarni monitoring qilishda koʻmak soʻragan.

Avval xabar berganimizdek, joriy yil 5 oktyabr kuni Tojikiston bosh vaziri Kohir Rasulzoda ham Rossiya bosh vaziri oʻrinbosari Marat Xusnullin bilan uchrashuvda Rossiyada tojikistonliklarning asosiy huquq va erkinliklar buzilayotgani masalasini koʻtargandi.

«Rossiyada migratsiya sohasini tartibga solish boʻyicha chora-tadbirlar davomida fuqarolarimizning asosiy huquq va erkinliklarining keng miqyosda buzilishi tendentsiyasidan xavotirga tushmaslik mumkin emas», – degan Rasulzoda.

10 oktyabr kuni Tojikiston prezidenti Imomali Rahmon va Rossiya Federatsiya kengashi spikeri Valentina Matvienko uchrashuvida ham mehnat migratsiyasi masalalari muhokama qilingan.

Tahlilchilarga koʻra, Moskva viloyatidagi «Krokus Siti Xoll»da roʻy bergan teraktdan keyin Rossiyada nafaqat Tojikiston, balki butun Markaziy Osiyodan borgan mehnat muhojirlariga nisbatan siyosat qattiqlashdi.

Bu holatni hatto Moskvaning chizgan chizigʻidan chiqmaydigan Checheniston rahbari Ramzan Qodirov ham keskin qoraladi. Qodirov RFda migratsiya siyosati qattiqlashayotganini oʻrta asrlar inkvizitsiyasiga oʻxshatdi. “Zamin” yangiliklarini “Telegram”da kuzatib boring