Erdoʻgʻon: “Yaqin Sharqdagi urush Turkiyaga yaqinlashmoqda”

^{Foto: “Report.az”}
Yaqin Sharqdagi urush Turkiyaga yaqinlashmoqda. Bu haqda Turkiya prezidenti Rajab Toyyib Erdoʻgʻon “Falastin kelajagi” anjumanida ma'lum qildi.

Uning ta'kidlashicha, agar Yaqin Sharqdagi urush tez orada toʻxtamasa, u yanada koʻproq mamlakatlarni qamrab olishi mumkin. Uning soʻzlariga koʻra, Turkiya ehtimoliy xavflarni bartaraf etish uchun barcha zarur choralarni koʻrmoqda.

Avvalroq Rajab Toyyib Erdoʻgʻon Buyuk milliy majlisidagi nutqida Livandan keyin Isroilning navbatdagi nishoni Turkiya boʻlishi mumkinligini aytgandi.

“Xalqaro hamjamiyat falastinlik tinch aholini Isroil harakatlaridan himoya qilish mexanizmini ishlab chiqishi kerak. Gitler 70 yil avval insoniyat ittifoqi tomonidan toʻxtatilganidek, Netanyaxu va uning qotil tarmogʻi ham ‘insoniyat ittifoqi’ bilan toʻxtatilishi kerak”, dedi u.

Shuningdek, Turkiya prezidenti Rajab Toyyib Erdoʻgʻon 25 sentyabr kuni BMT Bosh assambleyasidagi chiqishida ham Yaqin Sharqdagi vaziyat haqida keskin gapirgandi.

“Afsuski, soʻnggi yillarda BMTning oʻz asosiy vazifasini bajarishda ojizlik koʻrsatayotganini, tobora samara bermaydigan, qoloq va harakatsiz tuzilmaga aylanib borayotganini kuzatmoqdamiz”, degandi u oʻshanda. “Zamin” yangiliklarini “Telegram”da kuzatib boring