Makron: "Netanyaxu Isroil qanday paydo boʻlganini unutmasligi kerak”

Fransiya prezidenti Emmanuel Makron vazirlar kengashining yopiq majlisida Isroil bosh vaziri Binyamin Netanyaxu yahudiy davlatining BMT rezolyutsiyasi asosida tashkil etilganini yodda tutishi kerakligini ta'kidladi. Bu haqda oʻz manbalariga tayanib, Le Parisien gazetasi xabar berdi.

“Netanyaxu oʻz davlati BMT rezolyutsiyasi bilan tashkil etilganini unutmasligi lozim, shuning uchun u tashkilot qarorlariga qarshi chiqmasligi kerak”, degan Makron.

Siyosatchi 1947 yil noyabr oyida BMT Bosh assambleyasining Falastindagi Britaniya mandatini bekor qilgan va bu hududni yahudiy hamda arab davlatlariga boʻlgan ovoz berishiga ishora qildi.

Makron ushbu bayonotni Isroilning Livandagi BMT tinchlikparvar kuchlari joylashgan hududlarda “Hizbulloh”ga qarshi olib borayotgan harbiy operatsiyalari hamda tinchlikparvar kuchlarga hujumlar uchun Isroil elchisining Fransiya Tashqi ishlar vazirligiga chaqirilishi fonida bergan.

Netanyaxuning Makron bilan 15 oktyabrdagi telefon orqali suhbatidan soʻng, Isroil Bosh vaziri matbuot xizmati “Fransiya prezidentiga eslatma” sarlavhali bayonot tarqatdi. Unda quyidagilar ta'kidlanadi:

“Isroil davlati BMT rezolyutsiyasi natijasida emas, balki Mustaqillik urushidagi gʻalaba tufayli, koʻpchiligi Xolokostni boshdan kechirgan yoki Fransiyadagi Vishi rejimidan qochib qutulgan mard jangchilarning qoni evaziga qozonilgan. Shuni esda tutish lozimki, soʻnggi oʻn yilliklar davomida BMT yagona yahudiy davlatini mavjudlik huquqidan mahrum etish va oʻzini himoya qilish qobiliyatini yoʻqotish maqsadida Isroil davlatiga qarshi yoʻnaltirilgan yuzlab antisemistik qarorlarni qabul qilgan”.

Makron Netanyaxu Isroil Qanday paydo bo‘lgani Unutmaslik