Razvedka: Shimoliy Koreya harbiylari Rossiya armiyasidan qochib ketdi

^{Illyustrativ foto: Getty Images}
Rossiya armiyasi safiga jalb qilingan 18 nafar Shimoliy Koreya harbiylari Ukrainaning Bryansk va Kursk viloyatlari bilan chegarasidagi pozitsiyalaridan qochib ketgan. Bu haqda Ukraina razvedkasidagi manbalar xabar berdi.

Ma'lum qilinishicha, bu Ukraina bilan davlat chegarasidan 7 kilometr uzoqlikda sodir boʻlgan. KXDR harbiylarining qochish sabablari hozircha aniqlanmagan.

“Rossiya harbiylari ularni qidirishni boshlagan, biroq ular bu ma'lumotni oliy qoʻmondonligidan yashirishga harakat qilmoqda”, deyiladi xabarda.

Rossiya armiyasining 11-alohida gvardiya desant-shturm brigadasi negizida KXDR fuqarolaridan iborat boʻlgan, “maxsus buryat bataloni” deb nomlangan harbiy boʻlinma tashkil etilmoqda. Razvedka ma'lumotlariga koʻra, shaxsiy tarkibning taxminiy soni 3000 nafarni tashkil etadi.

batalonda oʻqotar qurollar va oʻq-dorilar bilan ta'minlash jarayoni olib borilgan. Taxminlarga koʻra, ushbu boʻlinma Rossiyadagi Suja aholi punkti va Kursk shahri yaqinidagi jangovar vazifalarni bajarishga jalb etilishi mumkin.

KXDRning Rossiya-Ukraina urushidagi roli

2024 yil yanvar oyida Shimoliy Koreya Rossiyaga qurollar berayotgani haqida dastlabki dalillar paydo boʻldi. Ekspertiza yanvar oyi boshida rossiyaliklar Xarkovga aynan Shimoliy Koreya raketasi bilan zarba berganini tasdiqladi. Bundan tashqari, Ukraina razvedkasi ma'lumotlariga koʻra, KXDR 1970-1980 yillarda Rossiyaga bir yarim million artilleriya oʻq-dorilarini joʻnatgan.

Iyun oyida esa RF va KXDR keng qamrovli strategik sheriklik toʻgʻrisidagi shartnomani imzolagan. U Pxenyan yoki Moskvaga qarshi tajovuz qilingan taqdirda oʻzaro harbiy yordam koʻrsatishni nazarda tutadi.

Ukraina prezidenti Vladimir Zelenskiy Shimoliy Koreya Rossiya armiyasiga nafaqat qurol-yarogʻ, balki shaxsiy tarkib ham etkazib berishini aytgan. 2023 yili Ukraina Mudofaa vazirligi razvedka bosh boshqarmasi Shimoliy Koreya harbiylarining cheklangan kontingenti, xususan, muhandislik qoʻshinlari boʻlinmalari Ukrainaning vaqtincha bosib olingan hududiga kelgani haqida xabar bergandi. “Zamin” yangiliklarini “Telegram”da kuzatib boring