Janubiy Koreya KXDR Ukrainadagi urushga qoʻshin yuborishni boshlaganini ma'lum qildi

^{Foto: Reuters}
Janubiy Koreya razvedkasi matbuot xizmatiga koʻra, Shimoliy Koreyaning 1 500 nafar askari allaqachon Uzoq Sharqdagi Rossiya poligonlarida boʻlib, u erdan Ukrainaga joʻnab ketishlari kutilmoqda.

Xususan, razvedka ma'lumotlariga koʻra, Shimoliy Koreya harbiy xizmatchilari Vladivostok, Ussuriysk, Xabarovsk va Blagoveshenskda joylashgan boʻlib, ularga rus kiyim-kechaklari va Rossiyaning qalbaki hujjatlari berilgan.

Uzoq Sharqdagi rossiyalik harbiy manba BBC’ga mazkur ma'lumotlarni tasdiqlagan. U, shuningdek, Shimoliy Koreya harbiylarining bir qismi allaqachon etib borganini va Ussuriysk yaqinidagi harbiy bazalarga joylashganini ma'lum qilgan.

Avvalroq Ukraina prezidenti Vladimir Zelenskiy Bryusselda nutq soʻzlab, KXDRdan urushga jalb etilishi mumkin boʻlgan 10 mingga yaqin harbiy xizmatchi haqida xabar bergan edi.

^{Foto: NIS}
Nomi oshkor etilmagan manbalarning Janubiy Koreya OAVga aytishicha, gap 12 mingga yaqin harbiy xizmatchi haqida ketmoqda.

Qayd etilishicha, Shimoliy Koreya qoʻshinlari Rossiya texnikasi va oʻq-dorilaridan foydalanmoqda. 2 600 nafar harbiy xizmatchidan iborat birinchi otryad avgust oyida qoʻlga olingan Kursk viloyatiga borishi mumkin.

Bundan tashqari, Janubiy Koreya razvedkasi rasmiylari shimoldan kelgan raketa zobitlari allaqachon jangovar zonada boʻlib, ruslarga Shimoliy Koreya raketalaridan foydalanishda yordam berayotganini da'vo qilmoqda.

Janubiy Koreya razvedkasi KXDR maxsus kuchlari Rossiyaga topshirilganini isbotlovchi bir nechta sun'iy yoʻldosh tasvirlari va fotosuratlarini e'lon qilgan.

^Foto:NIS
Janubiy Koreya va AQSh rasmiylari avvalroq Shimoliy Koreya Rossiyaga ballistik raketalar va boshqa oʻq-dorilar etkazib berayotganini ma'lum qilgandi.

Moskva va Pxenyan mazkur xabarlarni rad etgan. Kreml, shuningdek, Janubiy Koreyaning KXDR Rossiyaga Ukraina bilan urushida yordam berish uchun qoʻshin yuborgani haqidagi da'volarini ham rad etgan. “Zamin” yangiliklarini “Telegram”da kuzatib boring