Isroilda mudofaa vaziri iste’fosi ortidan namoyishlar boshlandi (video)

^{Foto: Flash90}
Isroil mudofaa vaziri Yoav Galant 6 noyabr kuni iste’foga chiqishi ortidan Quddus va Tel Avivda minglab odamlar namoyishga chiqdi. Ular bosh vazir Binyamin Netanyaxuga qarshi chiqib, G‘azoda HAMAS tomonidan garovga olingan isroilliklarni qaytarishni talab qildi. Bu haqda The Times of Israel xabar berdi.

Ma’lum qilinishicha, Tel Avivda politsiya namoyishchilarni tarqatish uchun yoqimsiz hidli kuchli suv oqimlaridan foydalangan. Muxolifat yetakchilaridan biri Yair Lapid fuqarolarni ko‘chaga chiqishga chaqirgan. U urush avjiga chiqqan paytda Galantning iste’fosini “telbalik” deb atagan.



Yoav Galant munosabati

Iste’fodagi mudofaa vaziri Isroil hukumatini garovdagilarni vataniga sog‘-omon qaytarishga chaqirdi.

"HAMAS tomonidan o‘g‘irlab ketilgan o‘g‘il-qizlarimizni qaytarish bizning ma’naviy va axloqiy burchimizdir. Buni iloji boricha tezroq, ular tirikligida qilishimiz kerak", dedi u.

^{Foto: The Times of Israel}
Galant garovga olinganlarni qaytarish mumkinligi, ammo bu “og‘riqli murosalarni” talab etishini aytdi.

"Isroil davlati bu kelishuvlarga qanday bardosh bera olishini, Isroil armiyasi esa buning uchun xavfsizlikni qanday ta’minlay olishni biladi", dedi Galant.
Isroil prezidenti bayonoti

^{Getty Images}
Prezident Isxak Gersog urush davrida yuzaga kelishi mumkin bo‘lgan siyosiy tartibsizliklardan ogohlantirdi.

"Isroilga kerakli so‘nggi narsa — urush ketayotgan paytda to‘ntarish va burilish", dedi siyosatchi.
U mamlakat xavfsizligi “har qanday o‘y-fikrdan ustun” bo‘lishi kerakligini aytdi.

"Mamlakat rahbariyatining vazifasi hozirgi davrda katta mas’uliyat bilan harakat qilish", deya ta’kidladi u.

AQSHning anonim mulozimi Vashingtonda Galantning iste’fosi va bunday qarorga nima sabab bo‘lgani borasida “savollar mavjudligini” ta’kidladi. “Zamin” yangiliklarini “Odnoklassniki”da kuzatib boring