Bayden va Tramp G‘azodagi isroillik asirlar masalasini yanvargacha hal qilishga kelishib oldi

^{Foto: Reuters}
AQSHning amaldagi va saylangan prezidentlari Jo Bayden va Donald Tramp 13 noyabr kuni Oval kabinetida bo‘lib o‘tgan ikki soatlik uchrashuv chog‘ida Respublikachilar partiyasining inauguratsiyasidan oldin G‘azoda garovga olinganlarni qaytarish zarurligini muhokama qilishdi, deb yozadi Axios manbalarga tayanib.

Oq uyga ko‘ra, garovga olinganlarning oilalari ulardan hamkorlikda ishlashni so‘ragan.

Nashr manbalarining qayd etishicha, Tramp bilan uchrashuv chog‘ida Bayden undan Isroil va HAMAS o‘rtasida garovga olinganlarni ozod qilish bo‘yicha kelishuvga erishish uchun birgalikda ishlashni so‘ragan. Ularning so‘zlariga ko‘ra, Tramp muammoni keyinga qoldirib bo‘lmasligini va u lavozimga kirishgunga qadar hal qilinishi kerakligiga rozi bo‘lgan.

Milliy xavfsizlik bo‘yicha maslahatchi Jeyk Sallivanning aytishicha, iste’foga chiqqan Bayden ma’muriyati Tramp jamoasiga bu masalada hamkorlik qilishga tayyorligi haqida “signal” yuborgan.

Shu kuni Bayden G‘azoda HAMAS tomonidan garovga olingan AQSH fuqarolarining oila a’zolari bilan uchrashgan. Oq uy prezident “barcha garovga olinganlarni ozod qilish bo‘yicha AQSHning sa’y-harakatlari to‘g‘risida yangilangan ma’lumotlarni” ularga taqdim etgani va uning ma’muriyati asirlarning qaytishini ta’minlash niyatida ekanligini ma’lum qilgan.

Ikki nafar Axios manbasiga ko‘ra, Bayden uchrashuvga kelganlardan qarindoshlari hali ozod etilmagani uchun uzr so‘ragan.

^{Foto: Reuters/ isroillik garovga olinganlarning suratlari}
2023 yil 7 oktyabrdan beri bo‘lib o‘tgan muzokaralar davomida isroillik garovga olinganlarning bir qismi ozod qilindi, bir necha kishi halok bo‘ldi. Isroil razvedkasi ma’lumotlariga ko‘ra, 101 nafar isroillik garovda qolmoqda. Ularning yarmi o‘lgani taxmin qilinmoqda. “Zamin” yangiliklarini “Youtube”da kuzatib boring