Zelenskiy: “Putinni qo‘lda qurol bilan 1991 yil chegarasiga qaytarishga yetarli kuchimiz yo‘q”

^{Foto: Reuters}
Ukraina prezidenti Vladimir Zelenskiy Qrimni qaytarish uchun o‘n minglab odamlarini qurbon qila olmasligini ma’lum qildi. U yarimorolni diplomatik yo‘l bilan qaytarish imkoniyatini aytdi. Bu haqda siyosatchi Fox News'ga bergan intervyusida gapirdi.

Amerika telekanali jurnalisti Ukraina prezidentidan o‘t ochishni to‘xtatish to‘g‘risidagi kelishuv yoki tinchlik shartnomasi doirasida bosib olingan hududlarning bir qismi Rossiya nazorati ostida qolishi mumkinmi, deb so‘radi.

“Biz Ukrainaning hech bir bosib olingan hududini qonuniy jihatdan Rossiyaga tegishli deb tan ololmaymiz. Gap 2014 yildan beri Putinning keng ko‘lamli bosqinigacha bo‘lgan davrda bosib olingan hududlar haqida ham bormoqda. Biz buni qonuniy jihatdan tan olmaymiz va qabul qilmaymiz. Boshqa tomondan, hozircha Putinni qo‘lda qurol bilan 1991 yil chegarasiga qaytarishga yetarli kuchimiz yo‘qligini tushunamiz”, dedi Zelenskiy.

Jurnalist Ukraina prezidentidan “ushbu urushga chek qo‘yish va Yevropada qon to‘kilishini to‘xtatish uchun tinchlik kelishuvi evaziga Qrimdan voz kechishga tayyormi”, deb so‘radi.

“Men avval ham aytganimdek, biz Qrimni diplomatik yo‘l bilan qaytarishga tayyormiz. Biz Qrimni qaytarish uchun o‘n minglab odamlarimizning hayotini qurbon qila olmaymiz. Qrimni diplomatik yo‘l bilan qaytarish mumkinligini tushunamiz”, deb javob berdi Zelenskiy.

Ukraina Qrimni diplomatik yo‘l bilan qaytarishga tayyorligi haqida Zelenskiy 2022 yil sentyabrida ham aytgan edi. Shunday bo‘lishi mumkin. Shubhasiz, Ukrainadagi odamlar bu masalani hal qilishning diplomatik yo‘lini ko‘proq qo‘llab-quvvatlaydi, degan siyosatchi. Boshqa munosabatlarida u Ukraina Qurolli kuchlari 1991 yil chegaralariga chiqqanidan so‘ng Ukraina Rossiya bilan muzokaralarga tayyor bo‘lishini ta’kidlagan edi.

AQSHning saylangan prezidenti Donald Trampning katta maslahatchisi Brayan Lanza esa Ukraina uchun endi Qrim yo‘qligini ta’kidlagan. U Rossiya bilan muzokaralarga erishish uchun Qrimdan voz kechishga to‘g‘ri kelishini bildirgan.

Rossiya Qrimni 2014 yilning martida, “xalq referendumi”dan keyin anneksiya qilgandi. Ukraina va xalqaro hamjamiyat referendum natijalarini tan olmaydi. AQSH va Yevroittifoq Qrimning Rossiya tarkibiga qo‘shib olinishi ortidan Rossiyaning bir qator kompaniyalari va amaldorlariga nisbatan sanksiyalar qo‘llagan. “Zamin” yangiliklarini “Odnoklassniki”da kuzatib boring