Ilon Mask Marsda toʻgʻridan toʻgʻri demokratiyani oʻrnatishni taklif qildi

^{Foto: Reuters}
Dunyoning eng boy odami va SpaceX rahbari Ilon Mask Marsda bevosita demokratiya oʻrnatish zarurligini aytdi, shu bilan birga u “marsliklar qanday boshqaruv tizimi oʻrnatishni oʻzlari hal qilishi”ni ham bildirdi.

Mask X ijtimoiy tarmogʻi foydalanuvchisining “Marsni mustamlaka qilganimizdan soʻng” sayyorada boshqaruv shakli qanday boʻladi, degan savoliga shunday javob bergan.

U ilgari ham vakillik demokratiyasi modelidan voz kechib, toʻgʻridan toʻgʻri demokratiyani afzal koʻrishni aytgan, chunki bu tizimda korruptsiya xavfi kamroq boʻladi. Tadbirkorning fikricha, vakillik demokratiyasi (bunda xalq tomonidan saylangan vakillar qonunlarni qabul qiladi) dastlabki kichik mustamlakalar uchun zarur emas. Aksincha, qonunlarning oʻzi qisqa va tushunish uchun sodda boʻlishi kerak.

2021 yilda tadbirkor shunday degandi: “Odamlarni Marsga yuborish — bu XVIII asrda AQSh tashkil etilganda boʻlgani kabi, hukumatning butun mohiyatini qaytadan tushunish imkoniyatidir”.

Sentyabr oyida Mask yaqin ikki yil ichida SpaceX Marsga beshta Starship uchuvchisiz kosmik kemasini yuborishi mumkinligini ma'lum qildi. Agar beshala apparatning hammasi Marsga muvaffaqiyatli qoʻna olsa, toʻrt yildan soʻng qizil sayyoraga inson boshqaradigan parvozlarni ham amalga oshirish mumkin boʻladi.

“Agar Erning oʻzida yadro urushi, qandaydir oʻta xavfli virus pandemiyasi yoki boshqa sabablarga koʻra demografik inqiroz yuz bersa, Marsni oʻzlashtirish Er tsivilizatsiyasini saqlab qolishga yordam beradi”, — deb ishonch bildirgan u.

Politico nashrining qayd etishicha, AQShdagi soʻnggi saylovoldi kampaniyasi davomida Mask Marsga odamlarni yuborish uchun zarur shartlar qatoriga respublikachilarning gʻalabasini kiritgan. Ba'zan u bu ikki voqeani bevosita bogʻlagan ham, xususan, X ijtimoiy tarmogʻida: “Agar insoniyatning Marsga etib borishini istasangiz, Donald Trampga ovoz bering!” deb yozgan. “Zamin” yangiliklarini “Telegram”da kuzatib boring