Qirgʻiziston Milliy xavfsizlik davlat qoʻmitasi rahbari mamlakatda universal janglarni toʻxtatishga chaqirdi

Qirgʻiziston Milliy xavfsizlik davlat qoʻmitasi rahbari Qamchibek Tashiyev mamlakatda universal janglarni toʻxtatishga chaqirdi va ularning yoshlarga, butun jamiyatga salbiy ta'siri haqida gapirdi.

Qamchibek Tashiyevning fikricha, universal janglar yoshlarda mushtlashuv, kuch ishlatish yoki doʻpposlash orqali hayotda muvaffaqiyatga erishish mumkin, degan notoʻgʻri tasavvur uygʻotadi.

«Universal jang sport emas, balki mushtlashuvning bir turi. Bunday musobaqalar yoshlarda muvaffaqiyatga kuch va tajovuz orqali erishish mumkin, degan notoʻgʻri ishonchni uygʻotadi. Ta'lim va ilmga tayanadigan avlodni tarbiyalashimiz kerak», dedi Tashiyev.

U bunday faoliyat turi nafaqat axloqiy me'yorlarga, balki sogʻliq uchun ham xavfli ekanini ta'kidladi. Uning soʻzlariga koʻra, universal janglarning koʻplab ishtirokchilari 40 yoshga borib nogiron boʻlib qoladi.

Qamchibek Tashiyev sportchilar va yoshlarni jismoniy rivojlanishga yordam beruvchi va davlat darajasida qoʻllab-quvvatlanadigan olimpiya sport turlariga oʻtishga chaqirdi.

U, shuningdek, boshqa mamlakatlarda jang san'atining mashhurligi uchun bahonalarni rad etib, Qirgʻiziston oʻz qadriyatlari va ustuvorliklariga e'tibor qaratishi kerakligini ta'kidladi.

«Bir-birini doʻpposlash va mayib qilish – Islom dini nuqtai nazaridan ham notoʻgʻri», dedi Tashiyev.

Shuningdek, Milliy xavfsizlik davlat qoʻmitasi rahbari Olimpiya qoʻmitasi, sport birlashmalari hamda Madaniyat va sport ishlari vazirligi huzuridagi Sport ishlari boshqarmasiga mamlakatda universal janglarni cheklash boʻyicha qat'iy choralar koʻrishga chaqirdi. “Zamin” yangiliklarini “Youtube”da kuzatib boring