Trampning maslahatchisi Putin bilan uchrashuvga tayyorgarlik boshlanganini aytdi

^{Foto: reuters.com}
AQSh saylangan prezidenti Donald Tramp va Rossiya etakchisi Vladimir Putin oʻrtasidagi uchrashuvga hozirdan tayyorgarlik koʻrilmoqda. Bu haqda Trampning milliy xavfsizlik boʻyicha maslahatchisi Maykl Uols ma'lum qildi, deb yozdi RBKga asoslanib Kun.uz nashri.

«Tayyorgarlik ishlari allaqachon olib borilmoqda», dedi u Putin bilan uchrashuv vaqti va shakliga aniqlik kiritmagan holda.

Ukraina prezidenti Volodimir Zelenskiy ishtirokidagi uch tomonlama uchrashuv haqidagi savolga javoban u «buning uchun aniq asos» yoʻqligini aytdi. Uols shuningdek, Putin va Tramp oʻrtasida «yaqin kunlar yoki haftalarda» telefon orqali suhbat oʻtkazilishini istisno qilmadi. «Bu biz birinchi navbatda tashlaydigan qadam boʻladi, keyin esa harakatni boshlaymiz», dedi u.

«Prezident Tramp fikriga koʻra, agar siz boshqa tomon bilan qandaydir muloqot va munosabatlarga ega boʻlmasangiz, kelishuvga erisha olmaysiz. Kelgusi oylarda bu borada albatta ishlaymiz», deb qoʻshimcha qildi u.

Tramp avvalroq Putin bilan muzokaralar oʻtkazishga, jumladan, Ukrainadagi urushni hal qilish masalasini muhokama etishga tayyorligini bir necha bor ta'kidlagan edi.

19 dekabr kuni Putin jonli efirda Tramp bilan uchrashishga tayyorligini aytdi. «Qachon uchrashishimizni bilmayman. Men u bilan toʻrt yildan ortiq gaplashmadim. Men bunga tayyorman, uchrashuvga ham tayyorman», dedi u. “Zamin” yangiliklarini “Telegram”da kuzatib boring