Trampning Daniya bosh vaziri bilan agressiv suhbati haqida ma'lum qilindi

^{Foto: besthdwallpaper.com}
AQSh prezidenti Donald Tramp oʻtgan hafta Daniya bosh vaziri Mette Frederiksen bilan telefon suhbatida Grenlandiyani qoʻlga kiritish niyati jiddiyligini ta'kidladi, deb yozadi Financial Times 24 yanvar, juma kuni. Shu bilan birga, Tramp suhbatni baland ovozda olib bordi, deya qoʻshimcha qiladi nashr Evropa Ittifoqining yuqori martabali rasmiylariga tayanib.

Qayd etilishicha, Tramp va Frederiksen oʻrtasidagi suhbat 45 daqiqa davom etgan. Oq uy bu borada hech qanday rasmiy izoh bermadi. Oʻz navbatida, Daniya bosh vaziri AQSh prezidentiga Skandinaviya qirolligining avtonom hududi boʻlgan orol AQShning «katta manfaatdorligi»ga qaramay, «sotilmasligini» tushuntirganini aytdi.

«Evropa Ittifoqining amaldagi va sobiq besh nafar yuqori martabali mulozimlari suhbat juda yomon oʻtganini aytishdi», — deyiladi FT xabarida. Qayd etilishicha, AQSh prezidenti Frederiksenning Daniya va AQSh oʻrtasidagi harbiy bazalar va foydali qazilmalarni oʻzlashtirish boʻyicha hamkorligini mustahkamlash boʻyicha takliflariga qaramay, oʻzini agressiv tutgan va qarama-qarshi kayfiyatda boʻlgan.

Transatlantik munosabatlardagi keskinlik kuchaymoqda

«Qoʻngʻiroq tafsilotlari Evropaning Trampning hokimiyatga qaytishi transatlantik munosabatlarni har qachongidan ham taranglashishiga sabab boʻlishi mumkinligi borasidagi xavotirlarini kuchaytiradi, chunki AQSh prezidenti ittifoqchilarga hududdan voz kechish uchun bosim oʻtkazmoqda», deb ta'kidlaydi mualliflar Grenlandiya, Panama kanali va hatto Kanadani egallab olish fikrini eslatib.

Daniya sobiq amaldorining soʻzlariga koʻra, Tramp agar Grenlandiyani sotishdan bosh tortsa, Daniyaga qarshi maxsus choralar koʻrish, masalan, ayrim tovarlarga yuqori bojlar joriy qilish bilan tahdid qilgan. Daniyaliklar Trampning harakatlaridan «shunchaki hayratda», deya qoʻshimcha qildi manba.

Ayni paytda, Daniya bosh vazirligi idorasi «anonim manbalar tomonidan berilgan suhbat talqinini qabul qilmasligini» aytdi. “Zamin” yangiliklarini “Telegram”da kuzatib boring