Ekspertlar: Rossiya yaqin 10 yil ichida Belarusni anneksiya qiladi

Kreml yaqin 10 yil ichida Belarusni NATOga qarshi tajovuz qilish maqsadida anneksiya qiladi, deya xulosa qildi Amerikaning Urushni oʻrganish instituti (ISW) ekspertlari.

Tahlil markazi saytida e'lon qilingan “Rossiyaning tinch istilosi: Belarus” hisobotida ta'kidlanishicha, “Rossiyaning Belarusni amalda qoʻshib olishga urinishlari AQSh, NATO va Ukraina uchun strategik xavflarni keltirib chiqaradi”.

^{Foto: Reuters}
"Kreml bir necha oʻn yillardan beri davom etayotgan va AQSh hamda NATOga nisbatan revanshistik geosiyosiy maqsadlariga erishish uchun Rossiyaning harbiy va iqtisodiy salohiyatini abadiy oshiradigan Belarusning haqiqiy anneksiyasi boʻyicha strategik sa'y-harakatlarning yakuniy nuqtasida turibdi", deyiladi hisobotda.

Maqola mualliflarining qayd etishicha, Moskvaning Belarusni amalda qoʻshib olish borasidagi sa'y-harakatlari garchi toʻliq boʻlmasa-da, allaqachon sezilarli muvaffaqiyatlarga erishdi, bu esa NATOdan Rossiyaning Belarus ustidan oʻsib borayotgan nazorati oqibatlarini, shuningdek, buning natijasida Rossiya AQSh, NATO va Ukrainaga qarshi foydalanishi mumkin boʻlgan imkoniyatlar va resurslarni qayta baholashni talab qiladi.

"Belarus — shunchaki Rossiyaning ittifoqchisi emas, Kreml uni Rossiyaning global kuchni proyeksiyalash qobiliyatini ta'minlovchi strategik vositasiga aylantirmoqda. Kreml Ukrainaga qarshi urushning uzoq davom etgan xarajatlarini qoplash, Rossiyaning Ukrainadagi urushdan keyin tiklanishini tezlashtirish va kelajakdagi urushlarga mustaqil ravishda tayyorgarlik koʻrishga yordam berish uchun Belarusdagi soʻnggi, ammo chuqur ildiz otgan muvaffaqiyatlaridan foydalanadi", deydi tahlilchilar.

Hisobot mualliflarining fikricha, Kreml Belarusni de-fakto anneksiya qilishga intilib, Ittifoq davlatini Rossiya hukmronligi bilan federativ hukumat shaklida shakllantiradi, bu esa Moskvaga Belarus boshqaruvining barcha jihatlari boʻlmasa-da, aksariyati ustidan hukmronlikni beradi. Bu tinchlik davrida:

• Belarus qurolli kuchlari ustidan toʻliq operativ va ma'muriy nazorat oʻrnatishni hamda Rossiya qoʻshinlarini doimiy joylashtirish;
  
• Kreml ustunlik qiladigan federal hukumat bilan siyosiy ittifoq tuzishni, bunda beloruslar va rossiyaliklar yagona davlat sifatida boshqarilishi uchun umumiy federal qonunlar va institutlar tizimini yaratishni;
  
• shuningdek, umumiy bozorlar, erkin ishchi kuchi harakati, yagona qonunlar va valyuta ittifoqini oʻz ichiga olgan toʻliq integratsiyalashgan iqtisodiyotni shakllantirishni nazarda tutadi.
  

Rossiyaning Belarusni amalda anneksiya qilish boʻyicha sa'y-harakatlari, garchi tugamagan boʻlsa-da, rivojlangan bosqichda va allaqachon AQSh, NATO va Ukraina xavfsizligiga hamda Belarusning suveren davlat sifatida keyingi mavjudligiga ekzistensial tahdid soladigan bosqichlarga etgan, deya ta'kidlaydi institut ekspertlari.

Ularning qoʻshimcha qilishicha, Rossiyaning harbiy muvaffaqiyatlari Belarusni Moskva NATO va Ukrainaga qarshi yoʻnaltirilgan armiyasini joylashtirishi mumkin boʻlgan bazaga aylantiradi.

Hisobot mualliflari Gʻarb NATOning sharqiy qanoti himoyasi va Ukraina mudofaasini qoʻllab-quvvatlash boʻyicha talablarni qayta koʻrib chiqishi kerakligini, chunki Rossiya Belarus aholisi va resurslarini asta-sekin oʻzlashtirayotgani haqida ogohlantirgan.

"Kreml hatto Gʻarb Ukrainaga gʻalaba qozonishda yordam beradigan eng qulay stsenariyda ham Belarusni amalda qoʻshib olishni davom ettirmoqchi", deya xulosa qilgan ISW.

Manba: Daryo.uz “Zamin” yangiliklarini “Telegram”da kuzatib boring