Foto: AP
Kanadaning Toronto xalqaro aeroportiga qoʻnish chogʻida Bombardier SRJ900LR samolyoti bortida boʻlgan yoʻlovchilarga 30 ming dollar (28 760 yevro) miqdorida tovon puli taklif qilindi, deb yozadi Daryo nashri.
Layner 17 fevral kuni Torontodagi Pirson xalqaro aeroportiga favqulodda qoʻnishni amalga oshirgan, u qoʻnish paytida yonib, agʻdarilib ketgan.
4819 reysining 76 nafar yoʻlovchisi va toʻrt nafar ekipaj a'zosidan hech biri halok boʻlmagan boʻlsa-da, ularning barchasiga tovon puli taklif qilingan. Delta Airlines vakilining ta'kidlashicha, moliyaviy taklif “hech qanday shartlar bilan bogʻliq emas”. Bu esa yoʻlovchilar aviakompaniyani sudga berishi mumkinligini anglatadi.
Agar barcha yoʻlovchilar toʻlovga rozi boʻlsa, aviakompaniya deyarli 2,3 million dollar sarflashiga toʻgʻri keladi. Ushbu aviahalokat oqibatida tan jarohati olgan 21 nafar yoʻlovchi mahalliy shifoxonalarga etkazilgan, ulardan 20 nafariga javob berilgan.
Guvohlarning soʻzlariga koʻra, samolyot shu qadar qattiq qoʻnganki, uning oʻng qanoti va dumi uzilib ketgan. U yongan, shundan soʻng uchish-qoʻnish yoʻlagida agʻdarilib ketgan. Yana bir guvohga koʻra, u bortda gaz hidini sezgan, kabina oynalaridan aviatsiya yonilgʻisi sizayotganini koʻrgan va iloji boricha tezroq chiqib ketishga uringan.
Samolyot halokatiga nima sabab boʻlgan?
Hozircha halokat sababi aniq emas. Aviatsiya mutaxassislarining fikriga koʻra, ehtimoliy omillar orasida: erdagi sharoitlar, uchuvchining qoʻnishdan oldingi harakatlari va shassi bilan yuzaga kelishi mumkin boʻlgan muammolar mavjud. Tekshiruv AQSh Milliy transport xavfsizligi kengashi koʻmagida Kanada transport xavfsizligi kengashi tomonidan olib borilmoqda.
Aniqlanishicha, qoʻnish paytida minora va uchuvchi oʻrtasidagi aloqa normal boʻlgan. Delta reysiga taxminan soat 14:10 da qoʻnishga ruxsat berilgan. Audioyozuvlarga koʻra, dispetcherlik minorasi uchuvchilarni yaqinlashishda “notekis havo oqimi” haqida ogohlantirgan.
Ob-havo qanday boʻlgan?
Kanada Meteorologiya xizmati ma'lumotlariga koʻra, halokat paytida Pirson aeroportida qor yogʻib, soatiga 32 milya (51 km/soat) tezlikda shamol esgan. Havo harorati Farengeyt boʻyicha 16,5 daraja atrofida (Tselsiy boʻyicha minus 8,6 daraja)ni tashkil etgan.
Tergovchilar samolyot qoldiqlari va uchish-qoʻnish yoʻlagini oʻrganmoqda, shuningdek, uchuvchilar kabinasidan samolyotning parvoz ma'lumotlarini qayd etuvchi yozuv qurilmalari va registratorlar laboratoriyaga joʻnatilgan.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
