Pokistonning janubi-g‘arbida "Balujiston ozodlik armiyasi" (BLA) separatistik guruhi yo‘lovchi poyezdiga hujum uyushtirdi. Bu haqda Reuters agentligi xabar tarqatdi. Otishma oqibatida poyezd mashinisti yaralangan, yo‘lovchilar esa garovga olingan.
Hujum tafsilotlari
Ma’lumotlarga ko‘ra, poyezd Kvetta shahridan Xaybar-Paxtunxva viloyati tomon harakatlanayotgan paytda hujumga uchragan. AFP agentligi Kvetta shahar rasmiylariga tayanib yozishicha, jangarilar poyezdni to‘xtatib, temiryo‘lni portlatgan va hozirda poyezdni nazorat qilmoqda. Taxminan 450 dan ortiq yo‘lovchi garovga olingan. Politsiya va xavfsizlik kuchlari favqulodda holat rejimini e’lon qilgan va yordam ko‘rsatish uchun yaqin atrofdagi shifoxonalar ogohlantirilgan.
Balujistondagi terroristik harakatlar
Balujiston — Pokistonning eng katta va eng qashshoq viloyatlaridan biri bo‘lib, bu hududda ko‘p yillardan beri separatistik harakatlar faoliyat yuritib kelmoqda. "Balujiston ozodlik armiyasi" 1970-yillarda tashkil etilgan bo‘lib, uning a’zolari Pokiston hukumatiga qarshi qurolli harakatlar olib bormoqda. BLA AQSH, Buyuk Britaniya, Yevroittifoq va Xitoy tomonidan terrorchi tashkilot sifatida tan olingan.
Balujistondagi xavfsizlik muammolari
Joriy hodisa ushbu mintaqadagi xavfsizlik muammolarining yanada chuqurlashib borayotganini ko‘rsatmoqda. 2024 yil 9 noyabr kuni ham Balujiston viloyatidagi temiryo‘l vokzallaridan birida xudkush terrorchi o‘zini portlatib yuborgandi. Ushbu hujumda 24 kishi halok bo‘lgan edi. Oradan ko‘p vaqt o‘tmasdan, "Balujiston ozodlik armiyasi" yana bir qo‘rqinchli hujumni amalga oshirdi.
Pokiston hukumati qanday chora ko‘radi?
Pokiston hukumati va xavfsizlik kuchlari hujumni bartaraf etish va garovga olingan yo‘lovchilarni ozod qilish uchun harakat qilmoqda. Hukumat rasmiylari BLA jangarilariga qarshi keskin javob qaytarishini bildirgan.
Balujistondagi terroristik harakatlar mintaqadagi xavfsizlikni yanada yomonlashtirishi mumkin. Bu hodisa nafaqat Pokiston, balki xalqaro hamjamiyat tomonidan ham jiddiy e’tiborga olinmoqda.
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
