Tramp uchta davlat bilan bojlarni yumshatish masalasida muzokara boshladi

AQSH prezidenti Donald Tramp Vetnam, Isroil va Hindiston bilan bojlarni yumshatish masalasida muzokaralar olib bormoqda. Bu haqda CNN o‘z manbalarga tayanib xabar berdi.

Ma’lumotlarga ko‘ra, Tramp ushbu davlatlar bilan savdo munosabatlarini qayta ko‘rib chiqish va bojlarni pasaytirish imkonini beradigan savdo bitimlarini muhokama qilgan. Muzokaralar davomida har bir davlat uchun alohida shartlar ko‘rib chiqilmoqda.

Isroil Bosh vaziri Binyamin Netanyahuning 7 aprel kuni Oq uyga tashrifi chog‘ida mazkur masalani shaxsan muhokama qilishi kutilmoqda. Bu haqda Axios nashri xabar berdi.

Eslatib o‘tamiz, 2 aprel kuni Tramp rasman Vetnam, Isroil va Hindistondan AQSHga import qilinadigan tovarlarga yangi bojlar joriy etganini ma’lum qilgan edi. Ya’ni:

- Isroil mahsulotlariga — 17%,
- Vetnam mahsulotlariga — 46%,
- Hindiston mahsulotlariga — 26% boj belgilangan.

Ushbu choralar xalqaro savdo aloqalariga qanday ta’sir ko‘rsatishi va muzokaralar qanday natija berishi hozircha noaniq. Ammo ekspertlar bu jarayonlar AQSHning tashqi savdo siyosatida muhim burilish bo‘lishi mumkinligini ta’kidlamoqda.