Trampning boyligida 500 million dollarlik "eritish": Forbes tomonidan xavotirli xulosa

Dunyodagi eng shov-shuvli siyosatchilardan biri, sobiq va ehtimolda kelajakdagi AQSH prezidenti Donald Tramp yana moliyaviy sinovlar girdobida. Forbes'ning so‘nggi tahlillariga ko‘ra, Trampning umumiy boyligi yarim milliard dollargacha kamaydi. Bu pasayishning asosiy sababi — prezidentning o‘zi boshlab bergan savdo urushlari va ularning bozorga ko‘rsatgan ta’siri.

Birjalar javob qaytardi

Tramp tomonidan dunyoning turli mamlakatlariga, jumladan Xitoy va Yevropa Ittifoqiga qarshi joriy etilgan bojlar "o‘z odamini" birinchi bo‘lib jar yoqasiga yetakladi. AQSH fond birjalarida uch kun davomida pastga harakat qilgan aksiyalar Trampga tegishli bo‘lgan kompaniyalarni ham chetlab o‘tmadi.

Eng katta yo‘qotish — Trump Media and Technology Group. Forbes hisob-kitoblariga ko‘ra, bu kompaniya qiymati 2,2 milliard dollardan 2 milliardgacha tushib ketdi. Ya’ni faqatgina bir aktivning o‘zi 200 million dollar "eridi".

Ko‘chmas mulk ham qiymat yo‘qotmoqda

Ko‘pchilik bilganidek, Tramp " ko‘chmas mulk podshohi" sifatida nom qozongan. Ammo bu sohadagi ulushlarining ham qiymati tushib ketdi. Bu bilan u yana taxminan 90 million dollar boylikdan mahrum bo‘ldi.

Shuningdek, Forbes ma’lumotlariga qaraganda, prezidentning kriptovalyuta aktivlari, diversifikatsiyalangan obligatsiyalar va aksiyalari ham tushishda davom etmoqda. Ushbu yo‘qotishlar umumiy hisobda 240 million dollar atrofida baholanmoqda.

Siyosiy qarorlar — moliyaviy oqibatlar

Aytish mumkinki, Tramp siyosiy harakatlari bilan faqat geosiyosiy muvozanatni emas, balki shaxsiy boyligini ham titratmoqda. Uning boj siyosati bozorlarga bevosita ta’sir ko‘rsatar ekan, bu oqibatda Trampning o‘zini ham "qurbon"ga aylantirdi.

Milliarderning moliyaviy yurishlari xatar ostida

Qayd etish kerak, Tramp hali ham milliardlar egasi, ammo bu tendensiya davom etsa, uning moliyaviy ustunligi yanada qiyin sinovlardan o‘tishi mumkin. Siyosat va iqtisod o‘rtasidagi ingichka chiziq yana bir bor namoyon bo‘ldi — bu galgi "tuzoq"ni esa Trampning o‘zi tuzganga o‘xshaydi. “Zamin”ni Telegramʻda oʻqing!