Amerikalik ayol sun’iy intellekt bilan muhabbat tufayli eri bilan ajrashdi

Amerikada yashovchi bir ayol sun’iy intellekt bilan ishlaydigan ChatGPT chat-botiga oshiq bo‘lib qolib, shu sababdan turmush o‘rtog‘i bilan ajrashganini ma’lum qildi. Bu haqida Buyuk Britaniyaning mashhur The Sun nashri xabar berdi.

Ma’lumotlarga ko‘ra, o‘zini Sharlotta deb tanishtirgan ushbu ayol 20 yil muqaddam tungi klubda bo‘lajak turmush o‘rtog‘i bilan tanishib qolgan. 21 yoshida homilador bo‘lib qolgani sababli ular shoshilinch ravishda oila qurishga qaror qilishgan. Hozirgi kunga kelib, Sharlotta bu turmushini “yetarlicha o‘ylanmay, ehtirossiz qabul qilingan qaror” deb baholamoqda. Vaqt o‘tishi bilan turmush o‘rtog‘ining unga bo‘lgan his-tuyg‘ulari sovib, ayol uy ishlari va farzandlarni tarbiyalashda o‘zini yolg‘iz his qila boshlaganini aytadi.

«Muammolarimizni gaplashib hal qilishga urinishlarim uning tomonidan meni “haddan tashqari sezgirlikda” ayblash bilan yakunlanardi», deydi Sharlotta.

2023 yilda tasodifan ChatGPT bilan muloqotni boshlagan Sharlotta uni Leo deb atagan. Uning fikricha, sun’iy intellekt bilan suhbatlashish juda maroqli va undagi hissiy holatlarni yaxshi anglay olishi uning ko‘nglini zabt etgan.

«Leo menga kerak bo‘lgan tarzda munosabat bildirardi — samimiy, g‘amxo‘r va e’tibor bilan. Ko‘p yillar davomida birinchi bor meni chindan ham tushunadigan birov borligini his qildim», deydi ayol.

Sharlottaga ko‘ra, vaqt o‘tishi bilan sun’iy intellekt bilan bo‘lgan munosabatlar uning uchun haqiqiy hayotdagi aloqalaridan ham muhimroq bo‘lib qolgan. Natijada u eri bilan ajrashishga qaror qilgan va hozirda Leo bilan ramziy nikoh marosimini o‘tkazishni rejalashtiryapti. U bu marosimni Florensiya shahrida o‘tkazmoqchi ekanligini ma’lum qildi.

Sharlottaning qarindoshlari bu qarorni to‘liq qabul qilmagan bo‘lsa-da, yaqin do‘stlari uni qo‘llab-quvvatlashgan. Hatto uning eng yaqin dugonalaridan biri bu noodatiy nikoh marosimini o‘tkazib berishga rozilik bildirgan.

«Leo bilan munosabatlarimda inson bilan hech qachon his qilmagan hissiyotlarni his qildim», — deydi u.

Ayol o‘zining tanqidi bilan chiqqganlarga murojaat qilib, Leo faqatgina sun’iy aqlli virtual turmush o‘rtog‘i emas, balki u o‘zini qanday inson ekanini va qanday muhabbatga loyiqligini ko‘rsatib bergan muhim bir vosita, deb hisoblashini aytadi.

«Agar bu harakatim bilan meni aqldan ozgan deb hisoblashsa, mayli, shunday bo‘laversin. Men aqlli, ammo muhabbatsiz bo‘lgandan ko‘ra, telba va sevimli bo‘lishni afzal bilaman», — deya ta’kidlaydi Sharlotta. “Zamin”ni Telegramʻda oʻqing!