Ilon Mask Ostin aholisi bilan ziddiyatda: Qo‘shnilar milliarderning panjarasini buzdirmoqchi!

Ilon Mask qo‘shnilari bilan tortishuvda: Milliarder nega o‘z uyi atrofidagi baland panjarani buzishi mumkin?

Amerikalik milliarder, Tesla va SpaceX kompaniyalari asoschisi Ilon Mask yana bir bor Amerika jamoatchiligi e’tiboriga tushdi. Bu safar u o‘zining yangi xarid qilgan uyi atrofidagi katta panjara sabab Ostin shahri aholisi bilan bahslashib qoldi. Bu haqda The New York Times nashri xabar bermoqda.

Ma’lum bo‘lishicha, Ilon Mask Ostinning eng nufuzli hududlaridan biri bo‘lgan qimmatbaho uylarni o‘z ichiga olgan mahalladan yangi ko‘chmas mulk sotib olgan. 6 million dollarlik bu uy avval boshida mahalliy aholining hech qanday diqqatini tortmagan. Biroq yangi uy egasining qurilish ishlari boshlashi bilan vaziyat o‘zgargan.

Qayd etilishicha, Mask uyni xarid qilgandan so‘ng uning atrofida besh metr balandlikdagi panjara hamda ulkan po‘lat darvozani qurish bo‘yicha keng ko‘lamli ishlar boshlangan. Mahalla aholisi esa bu holatdan tashvishga tushib, ko‘cha manzarasi va atrof muhit buzilayotganidan shikoyat qilishni boshlagan.

Muammo esa, Ostin shaharining ichki qoidalariga ko‘ra, ikki metrdan balandroq bo‘lgan panjaralarni qurish qat’iyan man etilganligi bilan bog‘liq. Biroq Mask bu qoidani buzib, qurilish ishlarini ruxsatnoma olmasdan boshlab yuborgan. Milliarder hatto qurilishni amalga oshirib bo‘lgach, o‘z panjarasini qonuniylashtirish uchun shahar hokimiyatiga murojaat qilgan.

Biroq Ostin shahar hokimiyati Maskning bu talabini rad etgan. Chunki ushbu talab qondirilsa, bu boshqa ko‘plab nufuzli shaxslarga ham qoidalarni chetlab o‘tish uchun bahona bo‘lib xizmat qilishi mumkinligi qayd etilgan.

Maskning bu qoidalarga amal qilmasligi mahalliy aholining jahlini chiqargan. Ular shahar kengashiga murojaat qilib, panjarani zudlik bilan buzib tashlashni talab qilishgan.

Bu bilan cheklanmasdan, Ilon Mask yana bir murojaat bilan chiqib, o‘z uyi haqidagi ma’lumotlarni davlat ko‘chmas mulk bazalarida oshkor qilmaslikni so‘ragan. Mask bu talabini o‘zining go‘yoki federal davlat xizmatchisi ekani bilan bog‘lagan va bu ma’lumotlarni faqat zarur hollarda taqdim qilishga tayyorligini aytgan.

Shahar hokimiyati esa bunday talabni ham rad etgan va Maskning o‘z maqomi bilan bog‘liq har qanday istisno talablariga yo‘l qo‘ymasligini ta’kidlagan.

Yaqin kunlarda Ostin shahar kengashida maxsus yig‘ilish o‘tkazilishi rejalashtirilgan. Bu yig‘ilishda mahalliy aholi vakillari va shahar rasmiylari Ilon Maskning bu harakatlarini muhokama qilib, noqonuniy panjarani buzish yoki jarima belgilanishi kabi choralarni ko‘rib chiqadi.

Mask bu muammoga qanday yechim topishi hozircha noma’lum, ammo bir narsa aniqki, Ostin aholisi va shahar hokimiyati bu holatga jiddiy qaramoqda. Qonunlar va qoidalarga amal qilish hamma uchun barobar bo‘lishi shartligi yana bir bor ta’kidlanmoqda. Hatto dunyodagi eng boy odam bo‘lsangiz ham, bu sizga maxsus imtiyoz bermaydi, deyishmoqda mahalliy aholi vakillari. “Zamin”ni Telegramʻda oʻqing!