Tramp Zelenskiyning 30 kunlik otashkesim taklifini qo‘llab-quvvatladi

AQSH prezidenti Donald Tramp Ukrainadagi qurolli to‘qnashuvlarni to‘xtatish bo‘yicha navbatdagi muhim bayonot bilan chiqdi. U Ukraina rahbari Vladimir Zelenskiyning Kremlga qaratilgan 30 kunlik o‘t ochishni to‘xtatish taklifini qo‘llab-quvvatlashini ma’lum qildi va Rossiyaga ogohlantiruv yo‘lladi.

Tramp 8 may kuni Truth Social ijtimoiy tarmog‘idagi sahifasida shunday yozdi:
"Agar otashkesim rejasi amalga oshmas ekan, AQSH va uning xalqaro hamkorlari Rossiyaga nisbatan yanada qattiq iqtisodiy sanksiyalar joriy qiladi".

Uning bayonoti, shubhasiz, asosiy ravishda Moskvaga qaratilib, AQSHning tinchlik jarayonidagi qat’iy pozitsiyasini yana bir bor namoyon etdi.

Tramp: "Bu muvaqqat emas, doimiy tinchlik bo‘ladi"

Trampning ta’kidlashicha, u Yevropa ittifoqi davlatlari bilan birgalikda Rossiya va Ukraina o‘rtasida barqaror tinchlik o‘rnatish ustida ish olib borayotganini bildirgan.

"Bu jarayon vaqtincha emas, balki doimiy tinchlik bilan yakunlanishi kerak. Otashkesim ana shu tinchlik kelishuvining birinchi qadamiga aylanishi lozim", — deya qo‘shimcha qildi Oq uy rahbari.

Zelenskiydan 30 kunlik otashkesim taklifi

Ma’lumot o‘rnida, 7 may kuni kechqurun Ukraina prezidenti Zelenskiy Kremlga murojaat yo‘llab, barcha harbiy harakatlarni kamida 30 kunga to‘xtatishni taklif qilgan edi. Bu taklif Kreml tomonidan haligacha rasman rad etilmadi, ammo javob ham berilmadi.

Ushbu bayonot Putin tomonidan 8 maydan 11 maygacha e’lon qilingan uch kunlik otashkesimning amalga kirishidan bir necha soat avval berildi. Rossiya tomoni bu otashkesimni G‘alaba kuniga bag‘ishlaganini bildirgan edi.

Bosim oshmoqda: Tramp jamoasi tayyor

May oyi boshida Bloomberg agentligi tarqatgan xabarlarga ko‘ra, Tramp ma’muriyati Rossiyaga iqtisodiy bosimni kuchaytirish maqsadida bir necha ssenariyni tayyorlab qo‘ygan. Ularda Putinning urushni sun’iy ravishda cho‘zib kelayotgani ta’kidlangan.

Zamin.uz tahririyati AQSH va Yevropa tomonidan Rossiya-Ukraina mojarosini diplomatik yo‘llar bilan hal etish bo‘yicha tashlanadigan har qanday jiddiy qadamlarni e’tibor bilan kuzatishda davom etadi. Siyosiy bosimlar, diplomatik takliflar va xalqaro faoliyatlar natijasi qanday bo‘lishi — yaqin kunlarda ma’lum bo‘ladi. “Zamin”ni Telegramʻda oʻqing!