Instagram bosimi va og‘ir tushkunlik — Misha Agravalning fojeali hayoti va undan qolgan dars

Hindistonning yosh va mashhur influenseri, Instagram blogeri Misha Agraval fojeali tarzda hayotdan ko‘z yumdi. U 24 aprel kuni, 25 yoshini nishonlashga bir necha kun qolganda o‘z joniga qasd qildi. Bu haqda avvalroq ma’lum qilinmagan bo‘lsa-da, 30 aprel kuni uning opasi tomonidan berilgan bayonot orqali tasdiqlandi.

Obunachilar orqali qurilgan hayot

Instagram'da katta auditoriya to‘plagan Misha Agravalning faoliyati ko‘plab yoshlar uchun ilhom manbaiga aylangandi. Uning sahifasiga 24 aprelda joylangan so‘nggi postda shunday yozilgan edi:

“Misha Agraval, 26 aprel 2000 — 24 aprel 2025.”

Ushbu yozuv sababi haqida ma’lumot berilmagan, ammo keyinchalik oydinlashdi — bu o‘lim shunchaki tasodif emas, balki uzoq vaqt davom etgan ruhiy azobning oqibati edi.

Tashqi dunyo — ichki kurash

Mishaning opasi o‘zining Instagram sahifasida singlisi telefonining fon rasmini baham ko‘rgan holda shunday yozdi:

“Telefonidagi rasm barchasini aytadi. Mishaning hayoti faqat obunachilar atrofida qurilgandi. Lekin Instagram haqiqiy hayot emas. Obunachilar esa haqiqiy muhabbat emas. Iltimos, buni tushuning.”

Uning xatlari orqali singlisi hayotidagi ichki kurashlar va xomush dardlar oshkor bo‘ldi. Opa-singil suhbatlarida Mishaning obunachilar soni kamayishi unga qanday kuchli ta’sir qilgani, uning qalbini qanday titratgani haqida so‘z boradi.

“Uning maqsadi 1 million obunachiga yetishish edi. Keyin kamayishni ko‘rgach, o‘ziga bo‘lgan ishonchi yo‘qoldi. 'Opa, agar obunachilarim ketsa, karyeram tugaydi', deb yig‘lardi”, — deb yozadi uning opasi.

Yuqori darajadagi bosim va ruhiy og‘irlik

Misha huquqshunoslik yo‘nalishida diplomga ega bo‘lib, Judicial Services imtihonlariga tayyorgarlik ko‘rayotgan edi. Ammo Instagram'da mashhurlik bosimi uning ichki muvozanatini buzdi. U raqamlar bilan yashashni odat qilgan, biroz pasayish esa uni chuqur tushkunlikka olib tushgan.

Opasining yozishicha:
“Men unga Instagram'ni faqat vaqt o‘tkazish vositasi sifatida qabul qilishni, o‘zini baxtli qilishga urinlishni maslahat berdim. Ammo u sog‘lomlikdan ko‘ra shuhratni afzal ko‘rdi. Afsuski, bu tanlov uni hayotdan uzdi.”

Bir hayot — yuz ming dars

Misha Agravalning ketishi butun ijtimoiy tarmoq foydalanuvchilari, muxlislari va influenserlar orasida katta ta’sir qoldirdi. Uning hayoti va o‘limi bir voqea emas, balki butun jamiyat uchun signal, ogohlantiruvchi zangdir.

Bu fojea bizga raqamli dunyoda inson qalbi va sog‘ligi qay darajada ehtiyojmand ekanini, virtual muhabbat emas, haqiqiy bag‘rikenglik va munosabatlar qadrliroq ekanini yana bir bor eslatadi.

Zamin.uz tahririyati Misha Agravalning yoshlik va muhabbat bilan to‘lgan hayoti to‘g‘risida yozganda, uning ketishi orqali jamiyat ruhiy sog‘likka bo‘lgan munosabatini qayta ko‘rib chiqishi, internet bosimiga qarshi immunitet yaratishi kerak, deb hisoblaydi.

Haqiqiy hayot — ekran ortida. Va inson qiymati — faqat "layk"lar bilan o‘lchanmaydi. “Zamin”ni Telegramʻda oʻqing!