Guseyn Gasanov soliq ishi bo‘yicha qidiruvda: bloger sirtdan hibsga olindi

Rossiyada mashhur videobloger va internet tadbirkori Guseyn Gasanovga nisbatan jinoiy ish qo‘zg‘atildi va u federal qidiruvga berildi. Tergovchilarning ma’lumotlariga ko‘ra, Gasanov katta miqdorda soliq to‘lashdan bosh tortganlikda va noqonuniy daromadlarni yuvishda ayblanmoqda. Bu haqda TASS axborot agentligi xabar tarqatdi.

Rasmiy ma’lumotlarga ko‘ra, bloger 2019–2021 yillar oralig‘ida 170 million rubldan ortiq soliqlarni to‘lamagan. Shuningdek, shundan 20 million rubl miqdoridagi mablag‘ni qonuniy ravishda yuvgani (legallashtirgani) aniqlangan. Tergov qo‘mitasiga ko‘ra, Gasanov hozirda xorijda ekani va Rossiya hududini tark etgani qayd etilgan.

Prokuraturaning bayonotida aytilishicha, bloger faoliyatidan kelib tushgan daromadlarni rasman yakka tartibdagi tadbirkor sifatida emas, balki qarindoshlari va tanishlarining shaxsiy bank hisob raqamlari orqali amalga oshirgan. Kelgan pullar keyinchalik yechib olinib, yoki naqd pul ko‘rinishida Gasanovning o‘ziga topshirilgan, yoxud uning shaxsiy hisob raqamlariga o‘tkazilgan.

Tergov natijasida Gasanovga nisbatan Rossiya Federatsiyasi Jinoyat kodeksining 174.1-moddasi, 4-qismi "b" bandi (jinoyat yo‘li bilan olingan katta miqdordagi pul yoki mulkni qonuniylashtirish) bo‘yicha sirtdan ayblov e’lon qilindi. Bunday jinoyat uchun juda katta jarima — 1 million rubl yoki 7 yilgacha ozodlikdan mahrum etish jazosi belgilangan.

Guseyn Gasanov bu holatga munosabat bildirdi

Bloger o‘zining ijtimoiy tarmoqlarida shunday yozdi:
“Yangiliklarni ko‘rdim. Ha, sirtdan qamoqqa olish baland gapdek eshitiladi, ammo aslida bu qadar dramatik emas. Soliq bo‘yicha barcha masalalar 2023 yilning o‘zidayoq yopilgan. Hozirda huquqshunoslarim bu ish bilan shug‘ullanmoqda. Hammasi hal bo‘ladi va nuqta qo‘yiladi”.

U o‘zini soliqdan qochganlikda ayblashlar haqida quyidagicha izoh berdi:
“OAVda men soliq to‘lamadim deb yozilyapti. Lekin men 320 million rubl jarima bilan birga barcha soliqlarni to‘ladim. Bu yerda kimgadir yoqmay qolgan bo‘lsam kerak... Kimki birovga choh qazsa, o‘zi unga tushadi”.

Ma’lumot uchun:
Guseyn Gasanov — “Millioner tafakkuri” onlayn kursi asoschisi, yirik inflyuyenser va biznes-mentor sifatida tanilgan. Uning Instagram sahifasida 30 milliondan ortiq, YouTube kanalining esa 1,37 million obunachisi bor. Uning shaxsiy brendi Rossiyadagi eng taniqli va tijorat jihatdan daromadli internet faoliyatlardan biri hisoblanadi.

Zamin.uz tahririyati mazkur voqea atrofida rivojlanayotgan barcha yangiliklarni kuzatishda davom etadi. Gasanovning ishi faqat shaxsiy emas, balki inflyuyenserlar faoliyatida shaffoflik va qonuniylik haqidagi keng muhokamalarga sabab bo‘lishi mumkin. “Zamin”ni Telegramʻda oʻqing!