Suriya port sohasida yangi sahifa ochdi: Rossiyani portdan chiqarib yubordi va uni BAAga topshirdi

Suriyada strategik ahamiyatga ega bo‘lgan port infratuzilmalarida yangi davr boshlanmoqda. Mamlakat portlar boshqarmasi dunyodagi yirik port operatorlaridan biri — BAAning DP World kompaniyasi bilan muhim hamkorlik memorandumi imzoladi. Bu haqda Suriya davlat televideniyesi xabar berdi.

Kelishuvga ko‘ra, Tartus porti terminalida logistika xizmatlari va infratuzilmani rivojlantirish uchun 800 million dollar miqdorida investitsiya jalb etiladi.

Tartusda yangi yo‘nalish: iqtisodiy zona va tranzit markazlar

Memorandum doirasida ikki davlat kompaniyalari maxsus iqtisodiy zonalar tashkil etish, yangi terminallar barpo etish va respublika hududlarida tranzit tugunlarini shakllantirish yuzasidan kelishib olgan. Bu nafaqat Tartus, balki Suriyaning butun logistika tizimi uchun yangi bosqichni boshlab berishi kutilmoqda.

Rossiya bilan tuzilgan kelishuv bekor qilindi

Mazkur yangi bitimdan avval, Suriya hukumati Rossiya bilan 2019 yilda imzolangan va 49 yilga mo‘ljallangan Tartus portini boshqarish bo‘yicha kelishuvni rasman bekor qilgan edi.

"Al Watan" gazetasining yozishicha, port bojxonasi rahbari Riyod Jodiga ko‘ra, ushbu kelishuv yuqori port yig‘imlari va texnik muammolar tufayli o‘zini oqlamagan. Tartus porti deyarli to‘liq ishlamagan va mamlakatning yangi rahbariyati port sohasidagi siyosatni tubdan qayta ko‘rib chiqishga qaror qilgan.

Rossiya tomonidan Suriyada joylashgan harbiy bazalarning boshqaruviga doir masala hozircha muhokamadan chetda qolgan. Kreml vakillari esa ikki davlat o‘rtasidagi aloqalar saqlanib qolayotganini ma’lum qilgan.

Latakiya port ham xorijiy investorlar qo‘lida

Bu so‘nggi vaqtdagi yagona port kelishuvi emas. 1 may kuni Suriya hukumati Fransiyaning mashhur CMA CGM logistika operatori bilan Latakiya portini boshqarish bo‘yicha 4 yillik shartnoma imzolagan. Bu loyiha doirasida 230 million yevrolik investitsiya kiritilishi belgilangan.

Iqtisodiy qayta tiklanish sari qadam

Suriyaning port infratuzilmasiga yirik xalqaro kompaniyalarni jalb etish orqali iqtisodiy barqarorlikka erishish va tashqi savdoni jonlantirish ko‘zlangan. DP World va CMA CGM kabi global operatorlarning kirishi Suriya portlarining xalqaro reyslar va tranzit logistikadagi rolini sezilarli darajada oshirishi mumkin.

Zamin.uz tahririyati mintaqadagi iqtisodiy va geosiyosiy o‘zgarishlar borasidagi yangiliklarni yoritishda davom etadi. Sizcha, Suriya portlariga qaysi davlatlar yana qiziqish bildirishi mumkin? “Zamin”ni Telegramʻda oʻqing!