Tramp ma’muriyati G‘azodan 1 million falastinlikni Liviyaga ko‘chirmoqchi

AQSHda Donald Tramp ma’muriyati G‘azo sektoridagi gumanitar inqirozni o‘zgacha yo‘l bilan hal qilish tashabbusini ko‘rib chiqmoqda. NBC telekanali manbalarining ma’lum qilishicha, Vashington 1 million falastinlikni ixtiyoriy ravishda G‘azodan Liviyaga ko‘chirish mexanizmini ishlab chiqmoqda.

Muammoli tashabbus – Liviya rozi bo‘lsa, aktivlar blokdan chiqariladi

Ma’lumotlarga ko‘ra, AQSH Liviya hukumatiga muayyan diplomatik imtiyozlar, xususan, avval muzlatilgan aktivlarni qayta faollashtirish orqali rag‘bat berish niyatida. Bu orqali Tramp ma’muriyati falastinliklarning ko‘chishini tashkil etish uchun Liviya roziligini olmoqchi.

Falastinliklar rozi bo‘ladimi?

Loyiha hali yakuniy tasdiqdan o‘tmagan, chunki amalga oshirish jarayonida jiddiy to‘siqlar mavjud. Eng asosiy savol — millionga yaqin falastinlik G‘azoni ixtiyoriy ravishda tark etishga rozi bo‘ladimi? Bu haqda aniq javob hozircha yo‘q.

Iqtisodiy yordam va rag‘bat choralari muhokamada

Vashington ma’muriyati ko‘chirishni osonlashtirish maqsadida falastinliklarga moddiy yordam ko‘rsatish, ularga uy-joy ajratish, hatto muayyan miqdorda nafaqa berish imkoniyatini muhokama qilmoqda. Ammo bu AQSH budjeti uchun sezilarli xarajat talab qiladi.

Liviyaning ichki barqarorligiga tahdidmi?

Telekanal tahlilchilari ta’kidlashicha, allaqachon siyosiy va ijtimoiy jihatdan noyob barqarorlikda bo‘lgan Liviyada yana 1 million migrantning joylashishi mamlakatdagi vaziyatni yanada keskinlashtirishi mumkin. Qolaversa, ularning qaysi hududlarga joylashtirilishi va bu qanday amalga oshirilishi hozircha noma’lumligicha qolmoqda.

Zamin.uz tahririyatidan:
Falastin-Isroil mojarosidagi navbatdagi geosiyosiy g‘oya bo‘lgan bu tashabbus muhokama davomida turli bahslarga sabab bo‘lishi shubhasiz. Siz bu rejani qanday baholaysiz? Falastin muammosiga bu kabi yechimlar qanchalik mantiqli? “Zamin”ni Telegramʻda oʻqing!