Putin AQSHning tinchlik rejasini muhokama qilishni rad etdi

Rossiya prezidenti Vladimir Putin AQSH prezidentining maxsus vakili Stiv Uitkoff orqali taqdim etilgan Ukraina bo‘yicha tinchlik tashabbusini muhokama qilishni istamadi. Financial Times manbalariga ko‘ra, Putin Vashington, Kiyev va Yevropa tomonidan ishlab chiqilgan 22 banddan iborat tinchlik rejasi haqida gaplashishga ham rozi bo‘lmagan.

Mazkur reja 25 aprel kuni Uitkoffning Moskvaga safari chog‘ida muhokama qilinishi kerak edi. Ammo Rossiya rahbariyati Uitkoffga Putin bu masalani ko‘rib chiqishdan bosh tortganini ma’lum qilgan. Keyinchalik, reja Ukraina prezidenti apparati rahbari Andrey Yermak, Ukraina mudofaa vaziri Rustem Umerov va AQSH rasmiylari Marko Rubio, Kit Kellog ishtirokidagi onlayn muloqotda muhokama qilingan.

Putinning rad javobidan so‘ng, Uitkoff o‘tgan haftadagi (12–16 may) Rossiya rahbari bilan rejalashtirilgan uchrashuvni bekor qildi. U 2024 yil boshidan beri Putin bilan to‘rt marta ko‘rishgan, ammo hozirda yangi uchrashuv belgilanmagan.

Financial Times ta’kidlashicha, Putinning samarali tinchlik muzokaralaridan yuz o‘girishi hatto uning siyosiy tarafdorlari uchun ham yaqqol bo‘lib bormoqda. Bir kun oldin, 16 may kuni Donald Tramp Istanbuldagi muzokaralardan so‘ng shunday degan edi:

“Putin bilan kelishuvga yetishishimiz mumkin. Menimcha, u charchagan. Uning ko‘rinishi ham yaxshi emas, lekin yaxshi ko‘rinishini istaydi.”

Shu bilan birga, The New York Post Uitkoffning diplomatik uslubini tanqid qilgan. Gazeta yozishicha, u 25 aprel kuni Putin bilan uchrashuvga yolg‘iz, maslahatchilar yoki harbiy ekspertlarsiz borgan. Nashr manbasi uni “yaxshi inson, lekin tajribasiz va noo‘rin harakat qiluvchi shaxs” sifatida ta’riflagan.

Zamin.uz tahririyatidan:
Agar yuqori darajadagi siyosiy shaxslar o‘rtasida jiddiy muloqotning o‘zi amalga oshmasa, tinchlik muzokaralari qanday natija berishi mumkin? Ushbu vaziyat Rossiyaning muzokaralarga real yondashuvi haqida nimalarni anglatadi? Siz bu haqda nima deb o‘ylaysiz? “Zamin”ni Telegramʻda oʻqing!