Yevropa Ligasi finali oldidan muxlislar o‘rtasida ommaviy mushtlashuv sodir bo‘ldi!

Bugun Yevropaning eng nufuzli klub turnirlaridan biri hisoblangan Yevropa Ligasining final bahsi bo‘lib o‘tadi. Hal qiluvchi uchrashuv Ispaniyaning Bilbao shahrida, Toshkent vaqti bilan soat 23:59 da boshlanishi rejalashtirilgan. Finalda Angliyaning ikki kuchli klubi – "Manchester Yunayted" va "Tottenxem" jamoalari sovrin uchun kurashadi.

Biroq ushbu muhim o‘yindan oldin ikki klubning muxlislari o‘rtasida katta mojaro yuz bergani ma’lum bo‘ldi. El Diario Vasco nashrining xabar berishicha, muxlislar o‘rtasidagi to‘qnashuv kecha oqshom Ispaniyaning San-Sebastyan shahrida sodir bo‘lgan. San-Sebastyan Bilbaodan taxminan bir soatlik masofada joylashgan bo‘lib, ko‘plab muxlislar o‘yindan oldin shu yerda yig‘ilgan edi.

Ko‘chaga yig‘ilgan ikki klub muxlislari dastlab baland ovozda bahs va o‘zaro haqoratlar bilan bir-biriga murojaat qilgan. Guvohlarning ta’kidlashicha, mojaro "Tottenxem" muxlislaridan biri raqib klub muxlisini urib yuborayotganidan keyin keskin tus olgan va guruhlar o‘rtasida katta janjal kelib chiqqan.

Mushtlashuv paytida fanatlar atrofdagi stol va stullar, shisha stakanlar va chiqindi qutilarini bir-biriga otishgan. Bu jarayonda ko‘plab muxlislar yengil tan jarohati olgan. Ammo hodisa joyiga yetib kelgan politsiya tezkorlik bilan vaziyatni nazorat ostiga olib, janjalning yanada kengayib ketishiga yo‘l qo‘ymagan.

Ma’lum qilinishicha, bir nechta muxlislarga tibbiy yordam ko‘rsatilgan, lekin jarohatlanganlarning hech biri og‘ir ahvolda emasligi sababli shifoxonaga yotqizilmagan.

Aytish joizki, bu voqea ushbu ikki klub muxlislari o‘rtasidagi birinchi to‘qnashuv emas. Avval ham turli sabablar bilan fanatlar orasida mojarolar sodir bo‘lib kelgan. Politsiya va xavfsizlik kuchlari final o‘yini paytida ham ehtimoliy to‘qnashuvlarning oldini olish maqsadida jiddiy chora-tadbirlarni ko‘rgan.

Zamin.uz tahririyati muxlislarni sportdagi do‘stlik va hurmat qadriyatlariga amal qilishga chaqiradi va final bahsi atrofidagi barcha yangiliklarni diqqat bilan kuzatib boradi.

Sizningcha, muxlislarning bu kabi xatti-harakatlari futbol obro‘siga qay darajada zarar yetkazadi? “Zamin”ni Telegramʻda oʻqing!