Trampning “memkoin”i ortida kimlar turibdi? Kongress javob kutayapti

AQSH siyosiy sahnasida yana bir shov-shuvli voqea qayd etildi. Kongressdagi demokratik partiya vakili, Merilend shtatidan saylangan vakil Jeymi Raskin sobiq prezident Donald Trampga rasmiy so‘rov bilan murojaat qildi. Uning talabiga ko‘ra, Tramp yaqinda o‘tkazgan investorlar bilan kechki ovqatda qatnashgan shaxslarning to‘liq ro‘yxati va ular tomonidan “memkoin” kriptovalyutasini xarid qilish uchun sarflangan mablag‘lar manbalari oshkor qilinishi shart.

Bu haqda The Washington Post gazetasi ma’lum qilgan bo‘lib, ular Raskinning Kongressga yuborgan rasmiy maktubi bilan tanishib chiqqan.

“Amerikaliklar kim Trampga yuzlab million dollar berayotganini bilishi kerak”

Raskinning so‘zlariga ko‘ra, Trampning kriptovalyuta loyihasi shaffoflikdan yiroq va jiddiy savollarga javobsiz qolmoqda. Kongressmenning ta’kidlashicha:

“Bu ro‘yxat e’lon qilinsa, Amerika xalqi kim Tramp cho‘ntagiga yuzlab million dollar qo‘yayotganini bilishi mumkin bo‘ladi. Shundan so‘ng ular buning evaziga faqat foydasiz tokenlarmi, yoki boshqa imtiyozlar ham olmoqdami — aniqlash imkoni tug‘iladi.”

Uning fikriga ko‘ra, mazkur kripto loyiha nafaqat moliyaviy manfaatga xizmat qilmoqda, balki bu orqali ayrim jinoiy sxemalar ham amalga oshirilayotgan bo‘lishi mumkin. Shu bois Raskin ushbu tokenlardan tushgan mablag‘larning manbalari terrorchilik, narkotrafik yoki boshqa noqonuniy faoliyatlar bilan bog‘liq emasligini tekshirishni talab qilmoqda.

Parlament tekshiruvi boshlanmoqda

Kongressmanning murojaati ortidan Tramp faoliyati yuzasidan yangi parlament tekshiruvi boshlangani ma’lum qilindi. Bu tekshiruvning markazida — “TRUMP memkoin” kriptovalyutasi, uning moliyaviy oqimlari va investorlar bilan bo‘lgan aloqalar turibdi.

Aslida, ushbu kriptovalyuta loyihasi 2024 yilning oxirida, Trampning Truth Social platformasida yana prezidentlik saylovi uchun kurash olib borayotgan paytida ommaga e’lon qilingandi. CoinMarketCap ma’lumotlariga ko‘ra, tokenning kunlik savdo hajmi 11 milliard dollardan oshgan. Bu esa kripto ekspertlariga ko‘ra — favqulodda darajada yuqori foyda ko‘rsatkichi hisoblanadi.

Oq uy: “Bu shaxsiy tadbir edi”

Tramp tarafdorlari va uning shaxsiy matbuot kotibasi Kerolin Livitt bu kechki ovqat hech qanday rasmiy davlat tadbiri bo‘lmaganini va Tramp unda xususiy shaxs sifatida ishtirok etganini ta’kidlamoqda. Shuningdek, u prezidentlik davrida Tramp o‘z aktivlarini farzandlariga ishonchli boshqaruv asosida topshirganini eslatib o‘tdi.

Bu bayonotlar orqali Tramp tomoni ushbu tadbir va kriptovalyuta loyihasini shaxsiy biznes deb ko‘rsatishga urinmoqda. Ammo demokratik partiya vakillari bu pozitsiyani yetarlicha asosli deb hisoblamay, tekshiruvni davom ettirishga bel bog‘lashgan.

Trampning “memkoin”i ortida kimlar turibdi? Investorlar qanday shartlar asosida pul kiritgan? Mablag‘lar manbalari qanchalik qonuniy? Bu savollarga javob topish faqat siyosiy emas, balki huquqiy nuqtayi nazardan ham muhim.

Amerika siyosiy muhitida kriptovalyuta loyihalari orqali boyish, shaffoflik masalasi va manfaatlar to‘qnashuvi atrofidagi munozara yanada avj olishi kutilmoqda. “Zamin”ni Telegramʻda oʻqing!