Shimoliy Irlandiyada noroziliklar kuchaydi, 17 politsiyachi yaralandi

Shimoliy Irlandiyada muhojirlarga qarshi boshlangan ommaviy norozilik namoyishlari politsiya bilan to‘qnashuvlarga aylanib, jiddiy tartibsizliklarga sabab bo‘ldi. Ballimina shahrida ro‘y bergan voqealar oqibatida 17 nafar politsiya xodimi turli darajada tan jarohati oldi.

Mahalliy politsiya bayonotiga ko‘ra, dushanba kuni kechqurun Klonavon Terrasi hududida yuz bergan tartibsizliklar ikkinchi kecha ham davom etgan. Namoyishchilar huquq-tartibot idoralari xodimlariga molotov kokteyllari, toshlar, g‘ishtlar va hatto feyerverklar otgan. Natijada 17 politsiyachi jarohatlangan, ulardan ayrimlari shifoxonaga yotqizilgan.

Politsiya besh nafar shaxsni jinoiy harakatlarda gumon qilib qo‘lga olgan. Hukumat organlari bu shaxslarning shaxsini aniqlash va voqea tafsilotlarini tergov qilish ishlarini olib bormoqda.

Seshanba kuni kechasi Belfast, Lisbern, Kolerayn va Nyutaunebbi shaharlarida ham noroziliklar qayd etildi. Politsiya tun soat 1:00 gacha tartibni tiklashga muvaffaq bo‘ldi. Ayrim hududlarda namoyishchilar axlat quti va boshqa inshootlarga o‘t qo‘ygan, politsiya kuchlariga qarshi tosh otgan.

Noroziliklar mahalliy OAVda muhojirlar tomonidan voyaga yetmagan qizga zo‘rlashga urinilgani haqida tarqalgan xabarlardan so‘ng boshlangan. Jamoatchilikning qattiq g‘azabiga sabab bo‘lgan holat yuzasidan dushanba kuni ikki nafar 14 yoshli o‘smir sud oldida javob berdi.

Tahlilchilar bu kabi hodisalar faqat jinoiy ishning o‘zi bilan chegaralanib qolmasligi, balki keng jamoatchilikda muhojirlarga nisbatan munosabatni ham o‘zgartirishi mumkinligini ta’kidlamoqda.

Hozirda vaziyat to‘liq nazorat ostiga olingani aytilmoqda, biroq xavfsizlik choralari kuchaytirilgan holda saqlanmoqda.