Qozog‘istonda Starlink sun’iy yo‘ldosh interneti rasman ishga tushadi

Qozog‘iston raqamli taraqqiyot sohasida yangi bosqichga ko‘tarilmoqda. Mamlakat Raqamli rivojlanish, innovatsiyalar va aerokosmik sanoat vazirligi hamda Ilon Mask asos solgan SpaceX kompaniyasining Starlink loyihasi o‘rtasida ahamiyatli shartnoma imzolandi. Bu kelishuvga binoan, 2025 yilning uchinchi choragidan boshlab Qozog‘iston fuqarolari Starlink sun’iy yo‘ldosh terminallarini rasmiy ravishda xarid qilish va to‘liq qonuniy tarzda foydalanish imkoniyatiga ega bo‘ladi.

Shu vaqtgacha Starlink respublikada asosan sinov rejimida, ayrim maktablarda internetni ta’minlash uchun ishlatib kelingan, ammo oddiy aholi uchun rasman ochiq bo‘lmagan edi. Yangi kelishuv natijasida, chekka qishloqlar, tibbiyot muassasalari, mobil brigadalar va infratuzilma obyektlari, xususan, optik tolali internetni o‘rnatish murakkab yoki iqtisodiy jihatdan noqulay bo‘lgan hududlar ham yuqori sifatli va tezkor aloqadan bahramand bo‘ladi.

Ma’lumotlarga ko‘ra, Starlink xizmatiga ulanish uchun foydalanuvchilarga maxsus terminallar — sun’iy yo‘ldosh antennasi va qabul qiluvchi qurilma zarur bo‘ladi. Vazirlik xizmat ko‘rsatish shartlari hozircha muhokama jarayonida ekanini ma’lum qildi, biroq barcha texnik va huquqiy masalalar hal etilgandan so‘ng, fuqarolar uchun qonuniy va oson yo‘l bilan sun’iy yo‘ldosh interneti ochiq bo‘ladi.

Starlink — dunyodagi eng innovatsion internet loyihalardan biri. SpaceX tomonidan 2015 yilda boshlangan ushbu global tashabbusning asosiy maqsadi Yer sharidagi har qanday chekka, noqulay yoki aloqa yetishmaydigan hududlarni yuqori tezlikdagi internet bilan ta’minlashdir. Loyiha doirasida minglab kichik sun’iy yo‘ldoshlar fazoga uchirilgan va ular orqali foydalanuvchilar internetga ulanadi.

Qozog‘istonda Starlinkning to‘liq ishga tushirilishi mamlakat infratuzilmasi va ta’lim, tibbiyot, biznes sohalari uchun katta salohiyat yaratadi. Endi ko‘p yillar mobaynida aloqa yetishmaydigan chekka qishloqlar ham zamonaviy texnologiyalar olamiga qadam qo‘yadi. Mutaxassislar bu aholi hayoti sifatini yaxshilash, davlat xizmatlarini elektron formatda ko‘paytirish va innovatsiyalarni rivojlantirishda katta qadam bo‘ladi, deb hisoblashmoqda.

Shunday ekan, 2025 yildan Qozog‘istonda axborot zamonaviy va tezkor usulda tarqaladigan yangi davr boshlanadi. Starlink global tizimiga ulanish mamlakat raqamli taraqqiyotiga yangi sur’at baxsh etadi! “Zamin”ni Telegramʻda oʻqing!