Tarixda ilk bor: Robot inson ko‘krak qafasini ochmasdan yuragini almashtirdi

Yurak jarrohligida yangi davr boshlandi: AQSHda birinchi marta robot yordamida inson ko‘krak qafasini ochmasdan yurak transplantatsiyasi amalga oshirildi. Hyuston shahridagi Baylor St. Luke's klinikasida o‘tgan tarixiy operatsiya nafaqat amerikalik, balki butun dunyo kardiologiyasida ulkan voqea sifatida qayd etilmoqda.

45 yoshli og‘ir bemor uchun bu imkoniyat so‘nggi umid bo‘lgandi. U 2024 yil noyabridan beri tibbiy apparatga ulangan holda yashardi va an’anaviy usullar ko‘mak bera olmagan edi. Lekin yuqori malakali shifokorlar jamoasi zamonaviy robotlashtirilgan texnologiyaga ishonch bildirdi.

Odatda yurak transplantatsiyasida ko‘krak qafasi to‘liq ochiladi va bu juda og‘ir jarrohlik hisoblanadi. Biroq bu safar barchasi butunlay boshqacha bo‘ldi: robot jarroh kichik kesmalar orqali qorin bo‘shlig‘idan yurakni olib, yangi a’zoni o‘rnatishga yordam berdi. Jarrohga esa 3D kamera, joystik va pedallar yordamida barcha harakatlarni aniq boshqarish imkoni berildi.

Bu 2025 yil mart oyida amalga oshirildi va bir oydan keyin bemor to‘liq tuzaldi, shifoxonadan chiqib, qaytadan jismoniy faol hayotga qaytdi. Operatsiyani boshqargan yetakchi jarroh Kennet Lyao ta’kidlashicha, bunday robotlashtirilgan usul an’anaviy kesish bilan amalga oshiriladigan operatsiyalarga nisbatan bir qator ustunliklarga ega:
– Ko‘krak qafasining yaxlitligi saqlanadi;
– Infeksiya xavfi kamayadi;
– Tiklanish jarayoni tezlashadi.

Bu operatsiya AQSH tarixida birinchi marta amalga oshirildi va jahon tibbiyotida to‘liq yangi bosqichni boshladi. Shuningdek, 2024 yilda Saudiya Arabistonida ham o‘xshash robotlashtirilgan transplantatsiya qayd etilgan. Bugungi kunda robotlar nafaqat yirik sanoat tarmoqlarida, balki inson hayoti uchun eng nozik jarayonlarda ham aniqlik va samaradorlik bilan ishlayotgani isbotlanmoqda.

Kardiojarrohlikda bunday texnologik yutuqlar bemorlar uchun yanada xavfsiz, og‘riqsiz va tez tiklanadigan davolash imkoniyatlarini yaratib, umidlarga yangi quvvat bag‘ishlamoqda.

Zamin.uz tahririyati:
Zamonaviy tibbiyot insoniyat uchun mutlaqo yangi istiqbollarni ochmoqda. Yanada ko‘proq odamlar hayotini saqlab qolish uchun innovatsion texnologiyalar bizning xizmatimizda bo‘lib qoladi. “Zamin”ni Telegramʻda oʻqing!