Rossiya javob bermayapti: Ilhom Aliyev AZAL fojeasi uchun xalqaro sudga murojaat qilmoqchi

Ozarbayjonda 7 oydan beri javobsiz qolgan fojea ortidan keskin bayonot yangradi. Prezident Ilhom Aliyev mamlakat havo yo‘llariga tegishli AZAL aviakompaniyasi samolyoti halokati yuzasidan xalqaro sudlarga murojaat qilish niyatida ekanini ma’lum qildi.

Uning ta’kidlashicha, rasmiy Boku hodisani haqiqatga yaqin tarzda o‘rganib chiqqan va barcha dalil-isbotlarni to‘plagan. Ammo Rossiya tomonidan javob yo‘q. «Biz nima sodir bo‘lganini yaxshi bilamiz va buni isbotlashga ham tayyormiz. Afsuski, Rossiya 7 oydan beri nima uchun sukut saqlayotganini tushunish qiyin», – dedi Aliyev.

Prezidentning so‘zlariga ko‘ra, faqatgina haqiqatni yoritish bilan cheklanilmaydi. Ozarbayjon tomonidan aniq talablar qo‘yilmoqda:
– halokatga sababchi bo‘lgan shaxslarni jazolash;
– qurbonlar oilasiga tovon to‘lash;
– AZAL aviakompaniyasiga yetkazilgan moddiy zararni qoplash.

Ilhom Aliyev Rossiya rasmiylari voqeadan xabardorligini ta’kidlar ekan, qo‘shni davlatning pozitsiyasiga tanqidiy baho berdi. “Agar vaziyat teskarisi bo‘lganida, biz allaqachon o‘z so‘zimizni aytgan va zarur choralarni ko‘rgan bo‘lar edik. Ammo bunday vaziyatda sukut va bee’tiborlik noto‘g‘ri, hatto tahdidli hisoblanadi”, – dedi u.

Prezident shuningdek, Ozarbayjon barcha xalqaro huquqiy mexanizmlardan foydalanishga tayyor ekanini, qancha vaqt kerak bo‘lsa ham, adolat tiklanishi uchun intizom bilan kutilishini ta’kidladi.

Bu orada Ozarbayjon jamoatchiligi va siyosiy doiralar ushbu masalada chuqur tashvishga tushmoqda. Fuqarolar adolat qaror topishini, halok bo‘lganlarning xotirasi hurmat bilan e’tirof etilishini talab qilmoqda.

Aliyevning bayonoti, nafaqat mintaqaviy, balki xalqaro miqyosda ham jiddiy muhokamalarga sabab bo‘lishi kutilmoqda. Chunki bu fojea ortida qanday siyosiy muammolar yotgani, qanday faktlar yashirilgani va nega javobgarlikni o‘z zimmasiga olishdan qochayotgan tomon borligi kabi savollar ochiq qolmoqda.

Bu voqea, ehtimol, Rossiya va Ozarbayjon munosabatlarida yangi murakkab bosqichni boshlab berishi mumkin. Ilhom Aliyev esa o‘zining qat’iy pozitsiyasi orqali shunchaki bayonot emas, balki so‘z ortida amaliy harakat bo‘lishi mumkinligini anglatdi. “Zamin”ni Telegramʻda oʻqing!