Eronda 50 daraja issiqda davlat idoralari vaqtincha yopildi

Eronda yuzaga kelgan favqulodda va o‘ta kuchli issiqlik to‘lqini butun mamlakatda hayotni jiddiy tarzda izdan chiqarmoqda. So‘nggi kunlarda harorat ayrim hududlarda 50 darajagacha ko‘tarilib, xavfli ob-havo sharoiti suv hamda elektr ta’minotida katta uzilishlarga olib keldi. Mahalliy manbalarga ko‘ra, 23 iyul kuni mamlakatning qator viloyatlarida barcha davlat muassasalari va banklar vaqtincha yopildi.

Rasmiylar bunday chorani g‘ayritabiiy issiqlik va suv-energetika inqirozi tufayli qabul qilishga majbur bo‘ldi. Odatiydan ancha yuqori harorat fonida aholida sog‘liq bilan bog‘liq muammolar, elektr quvvati va ichimlik suvi ta’minotida uzilishlar kuzatildi. Eronning turli hududlarida davlat xizmatlari ko‘rsatish imkonsiz bo‘lib qolgan, aholining aksariyati uyda qolishga majbur bo‘lmoqda.

EtemadOnline agentligi ma’lumotiga ko‘ra, quyidagi viloyatlarda davlat muassasalari va banklar vaqtincha faoliyatini to‘xtatdi:

. Tehron
. Xuziston
. Kirmonshoh
. Markaziy
. Siston va Baluchiston
. Hormozgan
. Ilom
. Qum

Mahalliy rasmiylar aholiga ehtiyotkorlik bilan harakat qilishni, imkon qadar uyda qolishni va suv hamda elektr energiyasidan tejamkorlik bilan foydalanishni tavsiya qilishdi. Bunday issiqlik to‘lqinlari natijasida nafaqat davlat idoralari, balki maktablar va tibbiyot muassasalari ham faoliyatini to‘xtatishi mumkinligi aytilmoqda.

Mutasaddilarning ta’kidlashicha, ushbu holat barqarorlashmaguncha favqulodda choralar davom etadi va fuqarolarga kerakli yordam ko‘rsatiladi. Erondagi ushbu ekologik inqiroz xalqaro mutaxassislar va atrof-muhit faollari e’tiborini ham tortmoqda.
“Zamin”ni Telegramʻda oʻqing!