Microsoft zaifligi 400 tashkilotni xavf ostiga qo‘ydi

Microsoft’ning SharePoint dasturiy platformasidagi zaiflikdan foydalangan holda amalga oshirilgan keng qamrovli kiberjosuslik kampaniyasi hozirgacha kamida 400 tashkilotni jabrlanuvchi sifatida ro‘yxatga oldi. Bu haqda Gollandiyada joylashgan Eye Security kompaniyasi mutaxassislari ma’lum qildi.

Avvalroq hujumdan 100 ta tashkilot jabrlangani aytilgan edi, ammo keyingi tekshiruvlar real miqyos ancha kengroq ekanini ko‘rsatmoqda. Mutaxassislar bu raqam hali ham to‘liq emasligini, chunki barcha hujum izlari aniqlanmaganini ta’kidlamoqda.

“Hujum natijasida qolgan barcha izlar skanerdan o‘tmagan. Shuning uchun aslida zararlangan tashkilotlar soni bundan ko‘p bo‘lishi mumkin,” — dedi Eye Security kompaniyasining yetakchi mutaxassisi Vaisha Bernard.

Xavfsizlikdagi xatolik va Xitoy bilan bog‘liq da’volar
Hujumlar Microsoft’ning SharePoint server dasturidagi xavfsizlik nuqsoni to‘liq bartaraf etilmagach boshlangan. Bu zaiflik aniqlangach, Microsoft uni yamashga urinayotgan bir paytda, kiberjinoyatchilar uni faol ravishda ekspluatatsiya qilishga kirishdi.

Microsoft va Google mutaxassislariga ko‘ra, hujum ortida Xitoylik xakerlar turgan bo‘lishi mumkin. Biroq Pekin bu da’volarni rad etgan.

Jabrlangan tashkilotlar ro‘yxati hozircha to‘liq oshkor etilmagan. Bernard ularning shaxsini e’lon qilishdan bosh tortgan. “Zamin”ni Telegramʻda oʻqing!