AQSH prezidenti Donald Tramp Rossiya prezidenti Vladimir Putinga yanada aniq va qisqa muhlat belgiladi — endi Moskvada urushni yakunlash uchun faqat 10 kun bor. Bu haqda Tramp matbuot vakillari bilan muloqot chog‘ida ma’lum qildi, deb xabar berdi Oq үy rasmiylari.
Tramp o‘z so‘zlarida, agar yaqin 10 kun ichida tinchlik kelishuviga erishilmasa, AQSH Rossiyaga nisbatan yangi bojlar va ikkilamchi sanksiyalarni joriy etishini ta’kidladi. Uning ta’kidlashicha, bu choralar Rossiya iqtisodiyotiga qanday ta’sir qilishi aniq emas, ammo Vashington endi keskin va qat’iy pozitsiyada turibdi. “Bojlar va sanksiyalar Rossiyaga ta’sir qiladimi yoki yo‘qmi — bilmayman. Putinning urushni davom ettirish niyati borligi ko‘rinib turibdi, ammo biz o‘z yo‘limizdan qaytmaymiz”, — dedi Tramp.
Tramp sanoqli kunlarda sanksiya va iqtisodiy cheklovlarni joriy etish ehtimolini alohida qayd etdi. Bu jarayon boshlanishi bilan xomashyo bozorlarida qanday o‘zgarishlar bo‘lishi uni “xavotirga solmasligini” qo‘shimcha qildi. AQSH prezidenti bu muhlat bugundan boshlanishini, Rossiya esa 10 kun ichida aniq qaror qabul qilishi zarurligini aytib o‘tdi.
28 iyul kuni Donald Tramp Rossiya va Ukraina o‘rtasida tuzilayotgan kelishuvlar bo‘yicha ham o‘z fikrini bildirib, Istanbuldagi muzokaralardan norozi ekanini, oldinga siljish kuzatilmayotganini aytdi. Shu sababli, Rossiya bilan biznes aloqalarini davom ettirayotgan davlatlar ham yangi sanksiyalarga duch kelishlari mumkinligini ta’kidladi.
Eslatib o‘tamiz, Tramp ilgari 14 iyul kuni ham Rossiyaga 50 kunlik muhlat belgilagan, shu bilan birga Ukrainaga yangi qurollar yetkazib berish bo‘yicha va’da bergan edi. U nima uchun bunaqa aniq muddat qo‘yganini izohlab o‘tmadi, ammo endi bu muhlat 10 kunga qisqartirildi.
Dunyo jamoatchiligi esa, Vashingtonning yaqin kunlardagi qadamlari, Moskva va Kiyev o‘rtasida urush to‘xtatilishi borasida qanday voqealar rivoj topishini qiziqish bilan kuzatmoqda. Trampning keskin bayonotlari xalqaro siyosiy maydonda yangi bosim va murakkab savollarni keltirib chiqarmoqda.
