Isroil bosh vaziri Binyamin Netanyaxu G‘azodagi vaziyat yuzasidan xalqqa videomurojaat yo‘llab, unda HAMASni keskin tanqid ostiga oldi. Uning ta’kidlashicha, HAMAS o‘zining asosiy maqsadlaridan biri sifatida kelishuvlarga qarshi chiqishni ko‘zlamoqda va buning uchun turli vositalardan, jumladan, jahon bo‘ylab tarqatilayotgan ta’sirli videolar hamda voqelikka to‘g‘ri kelmaydigan targ‘ibotlardan foydalanmoqda.
“Men HAMASning nima niyatda ekanini juda yaxshi bilaman. Ular muzakarali yo‘l bilan hech qanday kelishuvga erishish niyatida emas. Ular jahon hamjamiyatining fikriga ta’sir o‘tkazish maqsadida qalbaki va shov-shuvli tasvirlar orqali bizning ichki birdamligimizni izdan chiqarishga urinyapti”, — dedi Netanyaxu murojaati davomida.
Isroil jamoatchiligi oldida chiqish qilar ekan, Bosh vazir videolar orqali tarqatilayotgan suratlar va materiallardan qattiq ta’sirlanganini yashirmadi. Shuningdek, u asirga olingan shaxslarning yaqinlari bilan shaxsan uchrashib, ularning dardiga quloq tutganini ta’kidladi.
Netanyaxuning so‘zlariga qaraganda, HAMAS tomonidan ushbu garovda ushlab turilgan insonlarga nisbatan qo‘llanilayotgan munosabat “natsistlar ikkinchi jahon urushi paytida yahudiylar bilan qanday muomala qilgan bo‘lsa, shunga o‘xshash”. Ya’ni, ularni qasddan ochlikda saqlash, insonparvarlik me’yorlarini qo‘pol ravishda buzish holatlari kuzatilmoqda.
“Biroq biz bu bosimlar va tahdidlar oldida chekindik deb o‘ylamasinlar. Men o‘z ota-onasi va yurtdoshlarining umidi bo‘lib turgan asirlarimizni ozod qilish, HAMASni butunlay yo‘q qilish va kelgusida G‘azo hududidan Isroilga hech qanday xavf solinmasligini kafolatlash maqsadida o‘z qarorimda yanada qat’iy turibman”, — deya xulosa qildi Isroil rahbari.
Bu bayonot nafaqat ichki jamoatchilikka, balki xalqaro miqyosda ham jiddiy signal sifatida baholanmoqda. Vaziyat keskin tus olayotgan bir paytda, har bir so‘z, har bir harakat katta siyosiy va insonparvar ahamiyat kasb etmoqda.
