Shveysariya Alp tog‘larida 4000 metr balandlikda qolib ketgan ikki nafar Germaniyalik alpinist bir kecha-kunduz davomida yordam kutishga majbur bo‘ldi, deb Welt nashri xabar berdi.
Maʼlumotlarga ko‘ra, ularning arqoni tog‘ yonbag‘rida siqilib qolgan va yomon ob-havo sababli Shveysariyalik qutqaruvchilar bir necha marta yordam berishga uringan, biroq natija bo‘lmagan.
Keyinroq Italiya qutqaruvchilari maxsus vertolyot yordamida operatsiyani amalga oshirib, alpinistlarni xavfsiz joyga olib tushishga muvaffaq bo‘lishdi. Ularning holati qoniqarli deb baholandi.
Braytxorn tog‘ida sodir bo‘lgan ushbu hodisa Italiya va Shveysariya chegarasida yuz bergani uchun qutqaruv amaliyotini italiyaliklar amalga oshirishgan.
Qutqaruvchilar murakkab sharoitda ham o‘z faoliyatlarini qatʼiyat bilan davom ettirib, inson hayotini saqlab qolishga muvaffaq bo‘lishdi.
Hozirda alpinistlar tibbiy ko‘rikdan o‘tkazildi va ularning umumiy ahvoli yaxshi ekani maʼlum qilindi.
“Zamin”ni Telegramʻda oʻqing!
