Ukraina va Rossiya o‘rtasidagi murakkab vaziyat AQSH prezidenti Donald Trampning yaqindagi bayonotidan keyin yanada o‘tkir tus oldi. Siyosiy maydondagi bu so‘zlar keskinlikning yangi bosqichini boshlab berdi va xalqaro hamjamiyat diqqat markaziga aylandi.
Eslatib o‘tamiz, Tramp Truth Social ijtimoiy tarmog‘idagi chiqishida o‘zidan avvalgi prezident Jo Baydenni Ukraina masalasida ortiqcha ehtiyotkorlikda aybladi. Unga ko‘ra, Bayden “Ukrainaga Rossiyaga qarshi hujum uyushtirishga yo‘l qo‘ymagan” va bu bilan jangda ustunlikka erishish imkoniyatini cheklagan.
Tramp esa o‘z so‘zida: “Hujumchiga qarshi zarba bermasdan turib, mojaroda g‘alaba qozonishning iloji yo‘q”, deya qat’iy bayonot berdi. Bu esa Kiyevda Rossiya hududiga zarba berishga de-fakto ruxsat sifatida qabul qilindi.
Kremlda esa bu gaplar qattiq norozilik va g‘azab uyg‘otdi. INSIDER-T tarqatgan ma’lumotga ko‘ra, “Trampning bayonoti Kiyevga uzoq masofali qurollardan foydalanish uchun signal sifatida qabul qilindi va Kreml bu holatdan juda g‘azablandi”.
Rossiya rahbariyatining mulohazalariga ko‘ra, bu holat nafaqat Moskva va Vashington o‘rtasidagi oldingi kelishuvlarni qayta ko‘rib chiqishga olib kelishi mumkin, balki Rossiya poytaxti uchun to‘g‘ridan to‘g‘ri xavf ham yaratishi ehtimoldan xoli emas.
Manbalar ta’kidlashicha, vaziyat shu qadar taranglashdiki, Rossiya prezidentining yordamchisi Yuriy Ushakov favqulodda tarzda Tramp atrofidagi shaxslar bilan muloqotga kirishgan. Xususan, u AQSH yetakchisining maslahatchisi Stiv Uitkoff bilan bog‘lanib, unga “prezidentingiz bilan mulohaza yuriting, keskinlikni cheklang”, deya taklif qilgan.
Shu tariqa, Trampning qat’iy so‘zlari Ukraina uchun qo‘shimcha imkoniyat sifatida ko‘rilsa, Rossiya uchun yangi tahdid va siyosiy xavotir uyg‘otuvchi omilga aylandi. Muttaxassislar esa kelgusi kunlarda mojaro yanada kuchayishi mumkinligini istisno etmayapti.
