Turkiya hukumati butun mamlakat bo‘ylab xavfsizlik infratuzilmasini kuchaytirish rejasini amalga oshirishga kirishdi. Rasmiy Anqaraning ma’lum qilishicha, mamlakatning barcha 81 viloyatida tinch aholi ehtimoliy urush va favqulodda holatlarda himoyalanishi uchun maxsus bombapanohlar barpo etiladi. Bu haqda Middle East Eye nashri o‘z manbasiga tayanib xabar tarqatdi.
Ma’lumotlarga ko‘ra, ushbu g‘oyani prezident Rajab Toyyib Erdo‘g‘an iyun oyida o‘tkazilgan hukumat yig‘ilishida ma’qullagan. O‘sha vaqtda Eron va Isroil o‘rtasida 12 kun davom etgan qurolli to‘qnashuv jahon hamjamiyati e’tiborida bo‘lgan edi. Isroil Eronga havo hujumlari uyushtirgan, Tehron esa ballistik raketalar bilan javob qaytargandi.
Loyiha doirasida Turkiya Uy-joy qurilish boshqarmasiga bevosita mas’uliyat yuklatildi. Shuningdek, Milliy razvedka akademiyasi tayyorlagan hisobotda hukumatga «Isroilning Eronga qarshi 12 kunlik urushi»dan xulosa chiqarish va tezkor ogohlantirish tizimlari hamda zamonaviy jihozlangan panohgohlar qurish tavsiya qilingan.
Hisobotda yirik shaharlardagi metro stansiyalaridan ehtimoliy mojaro sharoitida foydalanish, aholi orasida talafotlarni kamaytirish choralarini ko‘rish kabi takliflar ham ilgari surilgan.
Manbalar ta’kidlashicha, turk rasmiylari Isroilda qurilgan keng qamrovli panohgohlar tarmog‘idan katta taassurot olgan. Ushbu inshootlar havo hujumlari paytida minglab aholiga amalda himoya sifatida xizmat qilgan.
Seshanba kuni Turkiyaning NTV telekanali bu tashabbusning asosiy maqsadi «mumkin bo‘lgan harbiy to‘qnashuvlar yoki tabiiy ofatlarda, shu jumladan yadro tahdidlarida aholini himoyalay oladigan xavfsiz hududlar yaratish» ekanini ma’lum qildi.
Ayni paytda Turkiyada mavjud panohgohlar soni talabga javob bermaydi. 1987 yilda qabul qilingan nizomga ko‘ra, muayyan hajmdagi binolarda panohgohlar bo‘lishi shart, ammo amalda ular ko‘p hollarda avtoturargoh yoki ombor sifatida foydalanilgan.
Qurilish ishlariga mas’ul tashkilotlar Yaponiya va Shveysariya kabi davlatlarning tajribalarini o‘rganganini qayd etdi. Xabarlarga ko‘ra, ayrim shaharlarda, jumladan poytaxt Anqarada, panohgohlar qurilishi allaqachon boshlangan.
Mutaxassislar fikricha, ushbu loyiha Turkiyaning xavfsizlik tizimida yangi bosqichni boshlab berishi mumkin. Muxlislar esa bu tashabbus qanday natijalar berajagini qiziqish bilan kuzatmoqda.
