Ukraina rasmiylari Kiyev shahri va boshqa hududlarga qilingan yirik hujumlardan so‘ng xalqaro hamjamiyatga murojaat qildi. Mamlakat BMT Xavfsizlik Kengashining favqulodda yig‘ilishini o‘tkazish haqida rasmiy so‘rov yo‘lladi. Bu haqda qator xalqaro ommaviy axborot vositalari o‘z manbalariga asoslanib xabar tarqatdi.
Ma’lumotlarga ko‘ra, agentlik manbasi yig‘ilish sanasi aniq belgilanmaganini aytgan. Biroq so‘rov BMT Nizomining 34 va 35-moddalariga asoslangan. 34-modda Xavfsizlik Kengashiga xalqaro tinchlik va xavfsizlikka tahdid soluvchi vaziyatlarni o‘rganish huquqini beradi. 35-modda esa BMTga a’zo istalgan davlatga muammoli vaziyatni Xavfsizlik Kengashi yoki Bosh Assambleya muhokamasiga olib chiqish imkoniyatini taqdim etadi.
Ta’kidlanishicha, yig‘ilish kun tartibi “Ukrainada tinchlik va xavfsizlikni ta’minlash” mavzusiga bag‘ishlanishi rejalashtirilgan.
Shu bilan birga, Rossiya Mudofaa vazirligi 28 avgustga o‘tar kechasi Ukrainadagi harbiy-sanoat majmuasi korxonalari va harbiy havo bazalariga “uzoq masofaga mo‘ljallangan aniq qurollar” hamda hujumchi dronlar yordamida yo‘naltirilgan zarbalar berilganini ma’lum qildi.
Ukraina hukumati esa bunga javoban Kiyev shahridagi aholi yashaydigan turar-joy kvartallari ham hujumga uchraganini ta’kidlamoqda. Rasmiy ma’lumotlarga ko‘ra, voqea oqibatida 19 nafar fuqaro halok bo‘lgan.
Mazkur voqea xalqaro hamjamiyatda katta tashvish uyg‘otdi. Ukraina BMTdan jahon miqyosida xavfsizlik va tinchlikni ta’minlashda faolroq ishtirok etishni so‘ramoqda. Shu bois yaqin kunlarda BMT Xavfsizlik Kengashida Ukrainadagi vaziyat bo‘yicha qizg‘in muhokamalar bo‘lib o‘tishi kutilmoqda.
