Rossiya va Ukraina o‘rtasida davom etayotgan to‘qnashuvda yangi burilish ehtimoli paydo bo‘ldi. AQSH prezidentining maxsus vakili Stiv Uitkoff Fox News telekanaliga bergan suhbatida Moskva Kiyevga Donetsk viloyati orqali o‘t ochishni to‘xtatish taklifi bilan chiqqanini ma’lum qildi.
Uning aytishicha, bu taklif tarixiy ahamiyat kasb etadi, ammo Ukraina uchun juda og‘ir qaror bo‘lishi mumkin. «Rossiyaliklar tinchlik kelishuvini stolga qo‘ydi. Unda Donetsk (Ukrainaning Donetsk viloyati) masalasi bor. Bu ukrainaliklar uchun qabul qilib bo‘lmasdek ko‘rinishi mumkin. Lekin hech kim haligacha bunday o‘zgarishga erishmagan. Bu esa (AQSH prezidenti Donald Trampning) shaxsiy kuchli xarakteri va mojaroni tugatish, insonlar o‘limiga barham berish yo‘lidagi kuchli motivatsiyasini ko‘rsatadi. Biz urushning oxiriga yaqinlashyapmiz, deb hisoblaymiz», – dedi Uitkoff.
Shuningdek, u o‘z bayonotida bu hafta Nyu-York shahrida Ukraina vakillari bilan uchrashishni rejalashtirayotganini ta’kidladi. «Ukrainaliklar bilan muzokaralar bo‘ladi. Men ular bilan Nyu-Yorkda uchrashaman. Bu muhim signal hisoblanadi. Har kuni Rossiya bilan ham aloqada turibmiz. O‘ylaymanki, bu jarayon (Rossiya va Ukraina prezidentlari) o‘rtasida ikki tomonlama uchrashuv bilan yakunlanishi mumkin», – deya qo‘shimcha qildi AQSH vakili.
Shunday qilib, mojaro taqdirini hal qilishi mumkin bo‘lgan navbatdagi qadamlar qo‘yilmoqda. Agar taklif amalda ish bersa, bu tinchlik yo‘lidagi eng katta diplomatik yutuqlardan biri sifatida tarixga kirishi mumkin. Ukraina esa ushbu taklifga qanday munosabat bildirishi jahon siyosiy sahnasini diqqat bilan o‘ylantirmoqda.
