Turkiya Isroilga port va havo hududini yopdi

Turkiya tashqi ishlar vaziri Hakan Fidan mamlakat Isroil bilan dengiz va havo qatnovlariga qat’iy cheklovlar joriy qilinganini e’lon qildi.

Uning aytishicha, endi Isroil kemalari Turkiya portlariga kira olmaydi. Shuningdek, turk kemalariga ham Isroil portlaridan foydalanish taqiqlanadi. Isroilga qurol-yarog‘ tashiydigan konteyner kemalari esa Turkiya hududiga umuman kiritilmaydi.

Turkiya Isroilni G‘azodagi talafotlar uchun ayblab, xalqaro hamjamiyatni unga qarshi chora ko‘rishga chaqirmoqda. Shu yil boshida Anqara Isroil bilan barcha savdo aloqalarini ham to‘xtatgan edi.

Turkiya port ma’muriyatlari yaqinda agentlardan kemalarning Isroil bilan aloqasi yo‘qligini va u yerga xavfli yuk olib bormayotganini tasdiqlashni talab qila boshlagan.

Fidan, shuningdek, Turkiya G‘azoga havo orqali yordam yuborishga tayyorligini bildirdi. Uning so‘zlariga ko‘ra, samolyotlar hozir tayyor, mintaqa rasmiylaridan ruxsat kutilyapti. Isroil hukumati esa bu bayonotlarga izoh bermadi.