31 avgust kuni O‘zbekiston prezidenti Shavkat Mirziyoyev rafiqasi bilan birga Xitoyning Tyanszin shahrida joylashgan "Meyszyan" kongress markazida o‘tgan Shanhay hamkorlik tashkiloti sammitining norasmiy marosimlarida ishtirok etdi.
Ushbu nufuzli yig‘ilishda XXR raisi Si Jinping, Rossiya Federatsiyasi prezidenti Vladimir Putin, Belarus yetakchisi Aleksandr Lukashenko, Hindiston bosh vaziri Narendra Modi, Pokiston bosh vaziri Shahboz Sharif, Eron prezidenti Mas’ud Pizishkiyon, Qozog‘iston prezidenti Qosim-Jo‘mart To‘qayev, Qirg‘iziston rahbari Sadir Japarov, Tojikiston prezidenti Imomali Rahmon, Turkiya prezidenti Rajab Toyyib Erdo‘g‘an, Turkmaniston prezidenti Serdar Berdimuhamedov, Ozarboyjon yetakchisi Ilhom Aliyev, Mo‘g‘uliston prezidenti Uxnaagiyn Xurelsux kabi bir qator davlat arboblari qatnashdi. Shuningdek, Misr, Kambodja, Nepal va Armaniston hukumatlari rahbarlari hamda BMT bosh kotibi Antoniu Guterrish ham marosimda ishtirok etdi.
O‘zbekiston rahbari va rafiqasini sammit mezboni – Xitoy prezidenti Si Jinping va uning rafiqasi samimiy va iliq munosabat bilan kutib oldi. Bu oliy darajadagi samimiy munosabat tadbirga alohida ruh bag‘ishladi.
Keyinroq xorijiy delegatsiya yetakchilari uchun Shanhay hamkorlik tashkiloti Tyanszin sammitiga bag‘ishlangan badiiy konsert dasturi namoyish etildi. Konsert orqali ishtirokchilarga Xitoy madaniyati va san’atining go‘zal namunalari taqdim etildi.
Bu uchrashuvlar nafaqat siyosiy muloqot maydoni, balki mamlakatlar o‘rtasida do‘stlik va hamkorlik rishtalarini mustahkamlashda muhim ahamiyat kasb etdi.
