Birlashgan Millatlar Tashkiloti (BMT) tomonidan Pokistonda migratsiyani samarali boshqarish, odam savdosiga qarshi tizimli kurashish va inson huquqlarini himoya qilishga qaratilgan yangi tashabbus amalga oshirildi.
Ushbu tashabbus doirasida Migratsiya bo‘yicha tarmoq (UN Network on Migration – UNNM) rasman ish boshladi. Bu platforma BMTning turli agentliklari, davlat organlari va fuqarolik jamiyati vakillarini birlashtirib, muammolarga yagona yondashuvni shakllantiradi.
Tarmoq faoliyati 2030 yilgacha mo‘ljallangan Barqaror rivojlanish maqsadlari va Global migratsiya kelishuvi asosida yo‘lga qo‘yilgan. U asosan migratsiyaning xavfsiz, qonuniy va insonparvar yo‘llar bilan amalga oshishini ta’minlashga xizmat qiladi.
BMTning Pokistondagi doimiy koordinatori Muhammad Yahyo UNNM rahbari etib tayinlandi. Uning ta’kidlashicha, bu loyiha migratsiya sohasidagi siyosatlar va amaliyotlarni yaxshilashga xizmat qiluvchi muhim platforma bo‘ladi.
Muhammad Yahyo ta’kidladi: “Biz ushbu tarmoq orqali migrantlar manfaatlarini himoya qilish, ularga munosabatda adolatli yondashuvni shakllantirish va odam savdosining oldini olishni ko‘zlaganmiz”.
Yangi tarmoq doirasida ilk bor Migratsiya ko‘p sheriklik trast fondi (Multi-Partner Trust Fund – MMPTF) ham tashkil etildi. Bu fond mamlakatda odam savdosi, inson kontrabandasi va migrantlarga nisbatan huquqbuzarliklarga qarshi kompleks chora-tadbirlarni moliyalashtirishni ko‘zlaydi.
Fondning yo‘nalishi “butun jamiyat” yondashuvi asosida shakllantiriladi. Bu degani, faqat hukumat emas, balki xususiy sektor, fuqarolik jamiyati, NNTlar va xalqaro tashkilotlar ham mas’uliyatni bo‘lishadi.
