Nepalda yoshlar korrupsiyaga qarshi keng ko‘lamli norozilik namoyishlariga chiqib, 48 soat ichida hukumatning iste’fosiga sabab bo‘ldi. Namoyishlarda 70 dan ortiq odam halok bo‘ldi, yuzlab odamlar yaralandi va davlat hamda shaxsiy mulkka katta zarar yetdi.
Isyon ijtimoiy tarmoqlarga qo‘yilgan taqiq va siyosatchilar farzandlarining dabdabali hayotidan norozilik fonida yuzaga keldi. Dastlab tinch o‘tgan namoyishlar tezda tartibsizlikka aylanib, parlament, bosh vazir idorasi va yirik mehmonxonalar yoqib yuborildi.
Vaziyat nazoratdan chiqqach, hukumat armiyani jalb qildi va komendantlik soati e’lon qilindi. Keyinchalik Oliy sudning sobiq raisi Sushila Karki vaqtinchalik bosh vazir etib tayinlandi. U mamlakatni saylovlargacha boshqarishi kutilmoqda.
Mutaxassislarning aytishicha, bu voqealar Nepal siyosiy hayotidagi eng keskin burilishlardan biri bo‘ldi. Yoshlar endi jim qolmasligini va adolatsizlikka qarshi kurashishni davom ettirishini aytmoqda. Shu bilan birga, katta moddiy zarar va kelajakdagi barqarorlik borasida xavotirlar ham saqlanib qolmoqda.
“Zamin”ni Telegramʻda oʻqing!
