Hindistonning Rajastxan shtatida yuz bergan fojiali hodisa barcha ijtimoiy tarmoqlarda katta muhokamalarga sabab bo‘ldi. Ma’lumotlarga ko‘ra, 15 yoshli Shivani Keva ismli qiz suv olib kelish maqsadida Parvati daryosi bo‘yiga yo‘l olgan paytda kutilmaganda timsoh hujumiga uchragan.
Politsiya vakillari bildirishicha, hayvon qizning qo‘lidan mahkam tishlab, uni suv ichiga tortib ketgan. Guvoh bo‘lgan mahalliy aholi esa hodisani ko‘rib darhol yordamga shoshilgan. Ular qayiqlarda daryoga tushib, hayvonni haydashga uringan bo‘lsa-da, barcha sa’y-harakatlar samarasiz yakunlangan.
Hodisa joyiga politsiya va qutqaruv xizmatlari jalb qilingan. Bir necha soatlik izlanishlardan keyin ham natija topilmagani uchun qidiruv kechga yaqin to‘xtatilgan. Ammo ertasi kuni ertalab qishloq aholisi daryo yuzasida Shivanining jasadini ko‘rib qolishgan. Marhumaning tanasi sud-tibbiy ekspertizaga yuborilgan.
Ekspertizadan ma’lum bo‘lishicha, qizning o‘limiga cho‘kish sabab bo‘lgan. Tanasida og‘ir jarohatlar topilmagan, ammo qo‘llarida timsoh tishlari izlari aniqlangan. Keyinchalik politsiya jasadni yaqinlariga topshirgan.
Rajastxan hududida daryo va suv havzalari aholi uchun asosiy suv manbai hisoblanadi. Shu bois bunday hodisalar vaqt-vaqti bilan sodir bo‘lib turadi. Mahalliy olimlarning aytishicha, hududda timsohlar ko‘plab uchraydi va ular bilan bog‘liq falokatlar xavfi yuqori. Shuningdek, yaqinda Jaysalmer tumanida 200 million yillik fitozavr toshqotmasi topilgani ham ushbu hududning qadimiy tabiatini yaqqol ko‘rsatib turibdi.
Mutaxassislar ta’kidlashicha, aholiga suv manbalariga yaqinlashishda ehtiyotkorlikni kuchaytirish va maxsus xavfsizlik qoidalariga amal qilish zarur. Chunki suvda yashovchi xasharotlardan tortib yirtqich hayvonlargacha bo‘lgan tabiiy xavflar inson hayoti uchun katta tahdid solishi mumkin.
“Zamin”ni Telegramʻda oʻqing!
