AQSH prezidenti Donald Tramp Turkiya rahbari Rajab Toyyib Erdo‘g‘an bilan amalga oshirgan muloqot chog‘ida Rossiya prezidenti Vladimir Putin haqida keskin fikr bildirdi va uning urush harakatlarini darhol to‘xtatishi zarurligini ta’kidladi.
«Odamlarning hayoti behuda yo‘qotilyapti. Bu jarayon to‘xtashi shart, Vladimir Putin darhol to‘xtashi lozim... Rossiya bombalar, raketalar, qurol-yarog‘ va inson hayoti uchun ulkan mablag‘larni sarflamoqda, ammo natijada ular deyarli hech qanday hududga ega bo‘la olmadi», – deya Oq uy rahbari o‘z chiqishida qayd etdi.
Shu bilan birga, Amerika yetakchisi Turkiya rahbari haqida ham fikr bildirdi. Trampning ta’kidlashicha, Rossiya «Ukrainaga qarshi uzluksiz hujum olib borayotgan» paytda Erdo‘g‘an Moskvadan neft sotib olishni cheklash niyatida. Uning so‘zlariga ko‘ra, Turkiya Ukrainadagi voqealarga jiddiy ta’sir o‘tkazish imkoniyatiga ega.
«Erdo‘g‘anni hamma hurmat qiladi, men ham unga katta hurmatim bor. U xohlasa, Ukrainadagi urushning yo‘nalishiga jiddiy ta’sir ko‘rsatishi mumkin, biroq ayni vaqtda betaraf turishni ma’qul ko‘ryapti», – dedi Tramp.
Shuningdek, AQSH prezidenti Turkiya yetakchisini nafaqat o‘z mamlakatida, balki Ukraina va Rossiyada ham hurmat qilishlarini ta’kidladi. Trampning qo‘shimcha qilishicha, Erdo‘g‘an qudratli armiya tuzgan va AQSH qurol-aslahalaridan samarali foydalanmoqda. Shu bilan birga, u «Putinni Tramp kabi yaqindan taniydi».
“Zamin”ni Telegramʻda oʻqing!
