Pokiston ichki ishlar vaziri Muhsin Naqviy Afg‘oniston hududidan mamlakatning tinch aholisiga qarshi qilingan qurolli hujumlarni keskin qoraladi. Uning ta’kidlashicha, “Tolibon” kuchlari tomonidan Pokiston hududiga o‘t ochilishi xalqaro huquq me’yorlarini ochiqdan-ochiq buzish hisoblanadi.
“Bu harakatlar xalqaro normalarga zid. Afg‘oniston o‘t bilan o‘ynashyapti. Agar vaziyat davom etsa, biz bu tajovuzga munosib javob beramiz”, — dedi Naqviy.
Vazirning so‘zlariga ko‘ra, Pokiston hech qachon provokatsiyalarga berilib ketmaydi, biroq har qanday tahdidga qarshi qat’iy chora ko‘rishga tayyor. U Afg‘oniston rahbariyatini qo‘shnilik munosabatlariga putur yetkazmaslik va chegara xavfsizligini ta’minlashga chaqirdi.
“Xuddi Hindiston misolida bo‘lganidek, Afg‘oniston ham agar bosimni davom ettirsa, munosib javob oladi”, — deya qo‘shimcha qildi vazir.
So‘nggi haftalarda Pokiston va Afg‘oniston chegarasida keskinlik ortayotgani kuzatilmoqda. Ikki davlat o‘rtasida chegara xavfsizligi, migrantlar oqimi va qurolli to‘qnashuvlar masalalari bo‘yicha tortishuvlar kuchaygan.
“Zamin”ni Telegramʻda oʻqing!
