Bugun, 13-oktyabr kuni dunyo diqqati yana Misrning Sharm ash-Shayx shahriga qaratildi. Bu yerda G‘azo sektorida bir yildan ortiq davom etib kelayotgan mojaroni tugatishga qaratilgan Tinchlik sammiti bo‘lib o‘tmoqda. Agence France-Presse’ning diplomatik manbalarga tayanib xabar berishicha, tadbir doirasida mojaroga nuqta qo‘yishni ko‘zda tutgan muhim hujjat imzolanishi kutilmoqda.
Ma’lumotlarga ko‘ra, kelishuvni ta’minlovchi va uning bajarilishi uchun kafolat beradigan asosiy davlatlar sifatida AQSH, Misr, Qatar va Turkiya ishtirok etmoqda. Sammitda 20 dan ziyod davlat rahbarlari qatnashishi rejalashtirilgan. Tadbirga Misr prezidenti Abdel Fattoh as-Sisiy va AQSH prezidenti Donald Tramp hamraislik qilmoqda.
Manbalarning ta’kidlashicha, kelishuvning asosiy maqsadi — G‘azoda tinchlik jarayonini qayta yo‘lga qo‘yish, garovda bo‘lganlarni ozod qilish hamda gumanitar yordam miqdorini sezilarli darajada oshirishdir. Bu orqali mintaqadagi insonparvarlik inqirozini yumshatish va uzoq muddatli barqarorlikni ta’minlash ko‘zda tutilmoqda.
Shu bilan bir vaqtda, Isroil hukumati ham “Hamas” bilan kelishuv doirasida garovga olinganlarni ozod qilish jarayonini boshlashini ma’lum qildi. Rasmiy vakil Shosh Bedrosyanning aytishicha, qolgan 20 nafar garovdagi shaxs Xalqaro Qizil Xoch qo‘mitasiga topshiriladi. Ular maxsus kolonna — olti yoki sakkizta mashina orqali yetkazilishi rejalashtirilgan.
“Falastinlik mahbuslar garovdagi shaxslar Isroilga qaytganidan so‘ng ozod qilinadi”, — dedi Isroil hukumati vakili, kelishuvning amalga oshish tartibini izohlar ekan.
Diplomatlar bu hujjatni G‘azo mojarosi boshlanganidan beri eng katta siyosiy va insonparvarlik yutug‘i sifatida baholamoqda. Agar kelishuv to‘liq amalga oshsa, bu nafaqat mintaqada tinchlik yo‘lidagi muhim qadam, balki yaqin sharq siyosiy muvozanatida yangi bosqich bo‘lishi mumkin.
Xalqaro ekspertlar ham mazkur tashabbusni ehtiyotkorlik bilan ijobiy baholab, kelishuvning amaliy natijalari kelgusi haftalarda ma’lum bo‘lishini ta’kidlamoqda.
“Zamin”ni Telegramʻda oʻqing!
